AZA KAROHINAO

Nampidirin'i dadarabe | 3 Aog, 2009



Aza karohinao izay momba ny fiainany,

Na ireo fanaintainany

Na ireo fifaliana afeniny ao am-po,
Tandroviny tokoa
Ka tsy tiany aseho
Sy tsy asiany feo.

Aza anontaniana ireo tsiambaratelo
Izay hitanao mihelo
Ao anaty masony kanefa dia koboniny
Fihininy, tazoniny
Satria izay no sitrany…
Tsy fantatrao ny dikany !

Aza vinaniana ny anton’ireo tsiky
Nihelina dia dify…
Sy ny hevitry ny teny naloakany tsy nahy,
Nateliny indray
Dia nihery tao am-pony…
Tsy ho henonao intsony !

Aza fongarinao ny rakitry ny ela
Tsy foiny ho an-tserasera,
Aza takarinao ny ampitso feno nofy
Iondanany an-toky…
Fa eo izy androany
Dia tiavo fotsiny ihany !

DadaRabe
16/07/09  0 :00

 


30 Hevitra & 0 Verindrohy (trackback) amin\'ny "AZA KAROHINAO"

  1. Eka ozy !
    Tsara r'ise zany Tononklaonao zany ,tena efa vao lenta e!Mankasitraka hatrany e ! Misaotra nisy sy nizara taminay !
    Mpankafy zato isan-jato aho !
    Faha

    Nampidirin'i fahamarinana 03 Aog 2009, 13:50
  2. misaotra tompoko ô !

    Nampidirin'i DadaRabe 03 Aog 2009, 13:53
  3. Oay ! misy banga (teo am-panaovana coier-coller) kay ilay tononkalo fa andraso ampidiriko.

    Nampidirin'i DadaRabe 03 Aog 2009, 14:01
  4. Miarahaba, Araky ny mailaka nifanoratantsika izany dia efa ao amin'ny http://friendfeed.com/madagascar-blogs ny bilaogin'i Dadarabe e ;) Mankasitraka, dia faly dia faly izany satria mba haharaka kokoa ny fivoahan'ny tononkalonao izay aman-taonany moa izay no nahaliana ;-)) Thierry Nampidirin'i Thierry Andriamirado 03 Aog 2009, 15:31
  5. Ok Thierry !
    Mifankahita eo é!

    Nampidirin'i DadaRabe 03 Aog 2009, 15:53
  6. Ireo zavatra tsy ambara,
    Dia vao mainka mahaliana.
    Toy ilay voankazo voarara.
    Maha-velom-panontaniana.

    Nampidirin'i lehilahytsyresy 04 Aog 2009, 02:44
  7. Kanto ny tonokalonao e! Dia sondriana aho mamaky.Mahafinaritra.
    Efa niezaka mihitsy aho ny mandalo matetika mamaky ireto zavatra satria mahavariana ka dia miverina foana.

    Nampidirin'i Maeva74 04 Aog 2009, 08:40
  8. Lehilahytsiresy>

    Ny voarara
    Mahaliana
    Ny voalaza
    Efa tsy tiana

    Fangalam-piery
    Fomba fiaina
    Tsy an-tery
    Tsy an-taraina

    Nampidirin'i DadaRabe 04 Aog 2009, 11:51
  9. Misaotra maeva74 !

    Nampidirin'i DadaRabe 04 Aog 2009, 11:52
  10. Ekena DadaRabe e :))

    Nampidirin'i pissoa 04 Aog 2009, 17:51
  11. Faly mahita anao indray Pissoa !
    Saotra é!

    Nampidirin'i DadaRabe 04 Aog 2009, 18:52
  12. Aza anontaniana eee aza anontaniana aaa ! (tsy haiko raha hainareo io hira io fa miverimberina fontsiny io teny io @ ilay izy)

    Nampidirin'i Kdaombaramita 04 Aog 2009, 20:04
  13. profond be...
    yes!!

    Nampidirin'i simp 04 Aog 2009, 20:31
  14. Tononkalo mitondra hafatra
    Mazava dia mazava izany
    Ka hajaina DadaRabe !
    Misaotra tompoko.

    Nampidirin'i mangamaso 04 Aog 2009, 22:01
  15. Kdaombaramita >> ie, marina tokoa ny anao. Ilay hoe "Aza anontaniana", hiran'i Solo sy i Dédesse (duo).

    Nampidirin'i lehilahytsyresy 04 Aog 2009, 22:37
  16. Kdaombaramita> Tena tsy arako inday ilay hira. Ndeha jereko ao @ dailymotion rah hitako.
    Simp> ilay fiainana mihitsy indraindray tsy mora, nefa tsy sarotra...

    Mangamaso > Hafatra ifampitana é!

    Lehilahitsyresy > Hay ve niara-nihira i Solo (Andrianasolo?) sy dédesse é!

    Nampidirin'i DadaRabe 05 Aog 2009, 01:31
  17. Eny ry DadaRabe. Nisy hira vitsivitsy niarahan'i Solo Andrianasolo sy i Dédesse nihira en duo tany amin' ny faramparan'ny années 80s tany ho any (angamba teo anelanelan'ny 1985 sy 1990). Nampidirin'i lehilahytsyresy 07 Aog 2009, 05:44
  18. Hay va re ! miasotra nanome vaovao !

    Nampidirin'i DadaRabe 07 Aog 2009, 12:56
  19. Misaotra e!

    Nampidirin'i news2dago 14 Aog 2009, 19:35
  20. Ok news2dago. Miandry vaovao avy any aminareo é

    Nampidirin'i DadaRabe 14 Aog 2009, 23:55