MANIMANINA AHO ZAREO !

Nampidirin'i dadarabe | 24 Okt, 2008


MANIMANINA AHO ZAREO !



Manimanina aho zareo !
Iny tanindrazako iny !
Ka ny foko no toreo,
Mitanisa ny fahiny…
‘Njao mitazana iny lanitra sy kintana eny ambony,
Sentosento anie izany ! Ny alaheloko tsy tony !

Manimanina an’i dada
Sy manembona an’i neny,
Hany ka mibadabada,
Mitanondrika irery…
Mafy anie ny lavi-kavana, tsy afaka mihaona !
Ireo volana misosa, mifandimby koa ny taona !

Manimanina aho, indrisy !
Tsy mba mety manadino
Ireo lasa sy ireo nisy,
Ny ao am-poko anefa mino…
Fa ho avy ny andro mamy, hitsaharan’ny ankaso,
Ary ho tosa-pifaliana sy ho ritra ranomaso !

DadaRabe
24/09/08

 


16 Hevitra & 0 Verindrohy (trackback) amin\'ny "MANIMANINA AHO ZAREO !"

  1. Ilay fahatsiarovana
    zary fifaliana
    mipetraka anaty.
    Ilay alahelo
    tsy atao fahoriana
    fa njay 'lay fitia
    toa rano mikoriana.

    Kdaombaramita

    Nampidirin'i Kdaombaramita 25 Sep 2008, 06:39
  2. Misaotra Kdaombaramita à !
    Feno voninkazo ireo soratrao !

    Nampidirin'i DadaRabe 25 Sep 2008, 10:32
  3. Manimanina aho 'zareo
    @'izao andro takariva
    satria iny masoandro tazako iny
    dia efa avy tany an-tanàna

    Nobanjinin'ireo havana
    nanazava ireo namana
    ary ankehitriony kosa dia
    mba mizara izay ho anjarako

    koa dia afarako eto ianao
    hoe salama hono,
    ary koa mahatsiaro,
    rahampitso ihany manko dia antenaiko,
    hamangînao 'ndray ireo malalako

    any Gasikara lavitra any
    Tokinao.

    Nampidirin'i Tokinao 25 Sep 2008, 11:18
  4. Manja be ry Tokinao ilay hoe
    "iny masoandro tazako iny
    dia efa avy any an-tanàna".
    Marina tokioa izany fa iny ihany ilay hita any an !
    Mitondra hazavana ! any sy aty !

    Nampidirin'i DadaRabe 25 Sep 2008, 12:49
  5. Rehefa manimanina,
    tsy maha-latsa-kanina,
    manjary fanimpanina,
    hadino daholo ny planina.
    :-)

    Nampidirin'i lehilahytsyresy 25 Sep 2008, 14:02
  6. Lehilahytsiresy>

    Dia lasa voan'ny tazo
    Matory sy malazo
    Tsy miala am-pandriana
    Masiaka, be kiriana

    Nampidirin'i DadaRabe 25 Sep 2008, 14:12
  7. Mahafinaritra ilay sarin'ny tanana ,
    Mampahatsiaro ny tranonay fahiny ,
    Ambanivohitra tsara tarehy !
    Rano velona sy rivotra manga !
    No nandrotsirotsy anay tamin'izany .

    Misaotra DadaRabe mitondra itony ho anay ...

    Nampidirin'i Tritriva 25 Sep 2008, 15:13
  8. Dia manina i Tritriva
    Mahatsiaro ireo hariva
    Any ambanivohitra any
    tena kanto anie izany !

    Nampidirin'i DadaRabe 25 Sep 2008, 15:21
  9. Manimanina ny tiako aho izany
    Lasalasa ny vinany....

    Dia manina an'i dada sy i neny
    sy ny tanindrazana konkoa tsy adino

    Nampidirin'i maintikely 25 Sep 2008, 19:34
  10. Manina ny tiany
    anie i maintikely
    tsy adinony, tsy ariany
    i dada sy i neny
    dia ny tanindrazany
    angamba koa ny havany ?

    Nampidirin'i DadaRabe 25 Sep 2008, 20:42
  11. :-)
    Lasalasa ny vinany
    mahatsiaro ny akany.
    sy ny fomba rehetra any...
    ny fanosorana masinjoany...
    sy ny vary mameno vilany...
    eee mampanembona aok'izany...

    Nampidirin'i lehilahytsyresy 26 Sep 2008, 04:59
  12. Torapasika manjopiaka
    Lavitra azy ireo mpilomano.
    Tana-masoandro miaro hatsiaka
    Miarahaba anao ry fararano.

    Mandefa sary an-tsaina ny misy anao Dadarabe.Hafa ihany ilay Nosy nahabe.

    Nampidirin'i soanja 26 Sep 2008, 06:26
  13. Lehilahitsiresy>

    Ny vary am-bilany
    ary koa ny masonjoany
    ahatsiarovako ny any
    ilay Antsiranana any
    efa ela anie izany !

    Soanja>
    Tora-pasika manjopiaka
    Tsaroana ilay any amintsika
    efa tena ela be
    moa tadidinao va re ?

    Nampidirin'i dadarabe 26 Sep 2008, 10:53
  14. Ilay vary am-bilany
    Hanina amin'ny voanjobory
    asiana ron'anamany
    Tena majifa ts'isy intsony

    Ilay sendra takariva,
    tonga avy an-tsekoly
    indreo ireo kilonga maro
    mamely vary mangatsiaka !

    Tsaroana e, tsaroana foana
    ilay angano kelintsika
    rehefa alakamisy hariva
    manamaina tokontany.

    Eny mamy ilay akany
    tany no ilay fahiny
    Gasikara soa antsika
    Tsy adinoko mihitsy

    Kdaombaramita :)

    Lasa poety daholo ny tary eto izany klé !!!!!

    Nampidirin'i Kdaombaramita 26 Sep 2008, 14:46
  15. Izany rehetra izany
    Ry Kdaombaramita
    ahatsiarovana ny akany
    rehefa ela tsy hita

    Ilay alakamisy
    nihainoana angano
    ka tena maika mihitsy
    Nody tany an-trano

    Tantara daholo izany
    fa lavitra ilay Dago
    Ka dia manembona any
    mandefa vazovazo

    Nampidirin'i DadaRabe 26 Sep 2008, 17:54
  16. Manja be daholo ireo revintsika. Mampandefa nofy ilay hanina (tsy sakafo an !)

    Nampidirin'i DadaRabe 26 Sep 2008, 18:54