HENOKO INDRAY !

Nampidirin'i dadarabe | 27 Sep, 2008



HENOKO INDRAY !



Henoko indray ilay fitiavako iny,
Fitiavako fahiny,
Fa tsikinao nandalo iray minitra monja…
Dia indro fa nanonja,
Ilay hiaka ato anaty
Nataoko ho efa maty !

Henoko indray ilay doboky ny foko,
Ilay tanako toloko,
Miandry ilay anao hitantana ny ahy,
Izaho anie tsy sahy !
Fa tamin’ireny mantsy !
Zaza nifampihantsy.

Henoko indray ilay hafanana kely,
Tsy haiko velively !
Nananika ny lohako sy saiko manontolo,
Nofohaziny daholo !
Fa toy ny afo-mololo
Nirehitra nandoro !

Henoko indray kanefa…aoka ho any !
Mandalo fotsiny ihany !
Ny lalantsika akia, efa nisampana ela !
Tsy nisy mba tavela
F’ilay fitiavana iny…
Natelin’ny fahiny !

DadaRabe
27/08/08 


15 Hevitra & 0 Verindrohy (trackback) amin\'ny "HENOKO INDRAY !"

  1. Fitia fahazaza, fitia mbola pur,
    Fitiavan'ankizy samy mbola tsy mûr.
    Hadino teny ihany au fur et à mesure,
    Ny antony ve? satria la vie est dure.

    Nampidirin'i lehilahytsyresy 28 Aog 2008, 08:26
  2. Miarahaba .
    Ntsôô! fitiavana tamin'ny mbola zaza , tahakan'ny famohamandry , mifoha ny fitia ...
    Toa mba fotsifotsy be ireto zazakely ! asiantsika loko manja ny volo sy tarehy an !
    Rahefa mandroso be ny taona dia tsy maintsy miverimberina any taloha .
    Manao bilan'ireo fotoana efa lasa .
    Mihazakazaka sy mandalo aingana ny andro ...

    Nampidirin'i Tritriva 28 Aog 2008, 09:24
  3. Lehilahytsyresy> manja be ilay valiny calp clap clap

    Tritriva> tsy nahita sary gasy (na hafa) aho ry tritriva. :-)
    Tantara daholo ireny an !

    Nampidirin'i DadaRabe 28 Aog 2008, 11:38
  4. DadaRabe , misaotra fa mampandeha eritreritra daholo ny tononkalonao .
    Ary manja ny sarin'ankizy .
    Tantara daholo ireny anaovanao tononkalo ?...

    Nampidirin'i Tritriva 28 Aog 2008, 16:34
  5. fitiavana kely nisisika ...
    tsiky malefaka...

    mampatsiaro ahy ireo hira ireo.

    Fa tsara be ilay sary ry dadaRabe.
    DadaRabe ve no nanao an'io?

    Nampidirin'i maintikely 28 Aog 2008, 17:49
  6. Tritriva> misaotra é! ny tononkalonao koa anie mampandefa eritreritra é! Sa ahoana ?

    Maintikely> Tsy mahay manao sary ohatran'io aho Mintikely à snif !

    Nampidirin'i DadaRabe 28 Aog 2008, 20:25
  7. Torana aho ry DdRb sy LehilahyTsiresy a ! Mahery nareo e ! tsara fa tohizo.

    zaho moa tsy mbola afa-mitoraka fa dia nandalo dia nitsidika !

    Mahereza jiaby dia mampamangy amin'ny rehetra fa "izy hono hoe tsy manadino !"

    Nampidirin'i Tsikisariaka 29 Aog 2008, 11:17
  8. Manao ahoana Tsikisariaka, Ela izany !
    Dia miandry anao é!
    izahay eto ihany !

    Nampidirin'i DadaRabe 29 Aog 2008, 13:39
  9. Par: Ny mpanoratra
    Date: 17 juillet 2008 - 12:12

    Andriamanitra ô ,

    Fantatry ny saiko...,
    Tena antenaiko
    Satria ny foko dia hitolona
    amin’ ilay olon-tiako ...izay efa vadin’olona .

    Fantatry ny saiko
    Ary efa diso haiko
    ‘reo zanany efa maro,
    Fa ny ahy iniana atao, ....manaiky aho hifangaro.

    Ka indro aho manontany
    Hadisoako moa izany ?

    Ny fiangaviako am-bavaka
    Hitalahoako sy iriko
    Dia Aza avelanao hisaraka
    fa izy ihany ange no tiako !

    ..............................

    Omeo ahy re ny fony
    Tena omeo ahy tanteraka
    Dia aoka koa hohadinoiny
    Fa izy anie efa niteraka !.

    Ataovy lavitra ny sainy
    'Zay voadin’ny mariaziny
    Fa ny olon-tokana holalainy:
    “ Dia izaho, ... izaho hatrany no hotiaviny .

    Izay no vavaka asandratro
    Iangaviako anao fatratra
    Dia hanao voady aho isan’andro
    Fa mba omeo ilay valim-bavaka .

    Nampidirin'i za iany 17 Sep 2008, 14:48
  10. Par: bandy favy
    Date: 17 juillet 2008 - 13:05

    Ho an'i mpanoratra,

    Raha hosarahinao aminy izy
    Ka handao 'lay notiaviny
    Nofidiany ho renin-janany
    Dia tsy mba ampalahelo ve?

    Mba alaivo an-tsaina kely
    Ny fiainan'olona ho potika
    Sy 'reo fo ho rotidrotika
    Koa mba saino ihany re!

    Ny fitiavan-tena
    Mandifotra, mahamenatra
    Ny hevitrao miampanga, manaporofo
    Noho ity filàna ara-nofo.

    Aza antsoinao akory 'lay Mpahary
    Sao tsy mety,
    tsy ankasitrahany,
    Haratsiana an-karihary!

    Nampidirin'i za iany 17 Sep 2008, 14:50
  11. Par: TOVOKELY
    Date: 17 juillet 2008 - 14:51

    ry andriamanitra mahery
    sady tompo tsara ianao
    azafady enoy kely
    zao tonombavakay izao

    malahelo izany fo
    ary zendana tokoa
    f'izahay zanakao
    toa manao ny tsy fanao

    aiza ve ry tompo tsara
    enoy anie ity tantara
    ny vadinay mba bôgôsy
    misy tena sahy mikôty

    tsisy henamaso akory
    tena manorisory
    mila hapiteny ratsy
    soa aho mahatanty

    fa izao no faniriko
    ary tena hiangaviko
    tanterao ra sitrakao
    zao fangatahako izao

    kapoy ataovy mahamay
    anaro tsara mba ho fay
    mandritra ny androny tontolo
    ireo mpangala-badin'olo

    itondray rotsakazo
    izay mitady aoka hahazo
    oak'ianao tsy hisalasala
    fa daino raha vao manadala

    izay aloha no azo ambara
    fa ianao mahalala tsara
    izay tokony hatao
    izay sitrakao dia tantarao

    Nampidirin'i za iany 17 Sep 2008, 14:53
  12. Par: lasa vinany
    Date: 17 juillet 2008 - 16:38

    Vavaka ihany koa !!!!!!

    Tompo ô ! raha tena tiany ilay vehivavy
    Ka hamaly vavaka azy ianao
    Ataovy tsapany 'lay hoe "vady"
    Mba ho hajainy toa anao

    Fa ny fitiavana mihaitraitra
    Tsy hitondra fifaliana
    Fa fahoriana 'zay tsy laitra
    No hiampy fijaliana

    Ranomaso sy tomany
    No handriaka isan'alina
    Dia ekenao ve izany ?
    Sa dia mora hampiharina ?

    Ka sahy manandram-bavaka
    Hitalahoana any Aminao
    Mba ahafahana mitsabaka
    Sy hanadala tsotr'izao

    Ilay efa anjaran'olona
    Izay tsiriritiny aok'izany
    Vonjeo ny ankizy tsy ho sorona
    Fa tsy fidin'azy 'reo izany

    Nampidirin'i za iany 17 Sep 2008, 14:55
  13. Par: TOVOKELY
    Date: 17 juillet 2008 - 17:31

    mamela ny helokay
    ô tompo ray tsy toha
    fa be reo ditra vitanay
    zay mitambesatra ao ampo

    toa tsy fantatray intsony
    izay tokony hatao
    ny filanay no ambony
    adinonay ny didinao

    ampianaro zahay jesoa
    haoka ianao hanavao
    ny ao antsainay sy ny ampo
    mba homendrika anao

    raha mba azonay atao
    ny misitrika sy mihery
    dia nataonay tsotr'izao
    nohon'ity fo feno fery

    izahay mijangajanga
    mitririritra vadin'olo
    ra ny otanay angamba
    foana tsy hary izao tontolo

    ny vavakay toa manompa
    maniratsira tsotr'izao
    mampiseo ny maha-panota
    heverianay fa tsisy ianao

    be tokoa reo fahadisoana
    tafahoatra ka mifona
    aza raisinao ampo
    fa adinoy avokoa

    fa ianao izay nahary
    no tsy nandringana anay
    matoa zahay lavirary
    ka misaotra anao ry ray

    Nampidirin'i za iany 17 Sep 2008, 14:56
  14. Par: lasa vinany
    Date: 18 juillet 2008 - 11:18

    Raha mpilalao fitia ianao
    Nefa vavaka no asandratra
    Mba hamelana ny helokao
    Hihaino anao ve Andriamanitra ?

    Raha noho ilay sitra-po
    No nampisaraka mpivady
    Mety tsy ho iray na roa
    No efa rava vaky tady

    Handry foana ve ny saina ?
    Raha izay no mety hitranga
    Sa ianao efa midaina
    ka ny fiainanao no banga

    Dia fenoinao any an-kafa
    'Lay filibana sy ny janga
    Manimba ianao tsy mihafahafa
    Vao misy iray manangasanga

    Raha mba ny anao no atao izany
    Ahoana no mba hevitrao ?
    Ho faly ianao sa hitomany ?
    Eritrereto 'zay hatao

    Nampidirin'i za iany 17 Sep 2008, 14:57
  15. Misaotra an'i za iany amin'ny tononkalo maromaro

    Nampidirin'i DadaRabe 17 Sep 2008, 17:44