MISY LASA BIBY...

Nampidirin'i dadarabe | 23 Sep, 2008

Tena maro izay zavatra nampalahelo hita sy heno tetsy sy troa izay tao ho ao. Ny farany teo dia ilay zazavavy kely hita tery Anjanahary. Tena mahavaky fo sy mampiteny hoe "Misy tena efa lasa biby ve ny olona é!"

MISY LASA BIBY…

Misy lasa biby
Ary mampijaly, ireo tsy manan-tsiny,
Mamono tsy an-kifidy,
Ka ny maha-olona, ny azy efa nariany
Ka zary hadalana,
Miampy fahotana,
No hita miparitaka mameno ny tanàna,
Be ‘reo olon-dratsy, manitsaka lalàna !

Misy maty fo
Sy efa ts’isy antra, maty fahavelona
Sy afaka atidoha,
Faly mampahory ary koa mandevona
‘Reo velona miampify,
Mikatrikatri-nify,
Manjepizepy maso fa sempotry ny tahotra,
Fa sendra ny atambo, ny saina tena vahotra !

Misy lasa adala
Noho ny fitiavam-bola, fitiavana hidola,
Ka efa tsy mahalala…
Ny rariny sy hitsiny ny azy efa tola,
Devoly no hivavahany !
Ny ratsy no tadiaviny !
Izao ny fiaraha-monina taraina sy efa kivy,
Tsy hita izay atao…fa be no lasa biby !

DadaRabe
17/08/08  22 :16



6 Hevitra & 0 Verindrohy (trackback) amin\'ny "MISY LASA BIBY..."

  1. Fa nisy naninona tokoa moa ilay zazavavy tetsy Anjanahary izany ?
    Azafady re fa tsy dia nahavidy gazety loatra i LhlTsRs tato ho ato, ka tsy dia naharaka vaovao firy.
    ...
    Ary hafa indray itsy sarina bibiolona napetrak'i DadaRabe itsy ambony itsy an. (Mety ho biby vokatry ny croisement entre olombelona sy tigre ve io ? ...tpt...)

    Nampidirin'i lehilahytsyresy 25 Aog 2008, 00:41
  2. Lehilahytsyresy > HA ha ha ianareo manam-pahaizana itony !!!!!

    NIsy zazavavy kely nanaovana an-keriny dia nariany teny amin'ny cimétière Anjanahary ny fatiny.

    Nampidirin'i DadaRabe 25 Aog 2008, 01:52
  3. Loza mihitsy izy ity ry dadarabe ny loza farany nitranga izao dia ilay adala namono olona tetsy ambanidia dia novon'ny olona koa ilay adala avy eo ka maty ihany koa!

    Tena lasa biby araka ny teninao mihitsy

    Nampidirin'i news2dago 25 Aog 2008, 07:42
  4. Ie, tena nahalasa saina ahy izy iny.
    Tsy ampy ny fandraisana an-tanàna ara-pahasalamana ireo marary saina ka manjary eny an-dalam-be no mihetsika ny "crise".
    NAmpalahelo ilay ranamana voavono.
    Nampalahelo ihany koa ilay adala novonoina.
    Ary indrindra mampalahelo fa toy ny valala voatango ka very fanahy mbola velona ny vahoaka dia zary namono ihany koa ilay adala.

    Am-bava homana am-po mieritra.

    Nampidirin'i DadaRabe 25 Aog 2008, 12:09
  5. hay mba mampalahelo sy loza ry zareo zany vaovao izany, zahay dia tsy mba maheno mihitsy, angaha dia efa tena mafy be tsy ho zaka mihitsy ny fiainana any dago any ry DdRb fa dia lasa bibiolona araka ny sary napetrakao.
    Mitandrema ihany ianao razoky fa sao dia ho kamboty tsy fidiny eto zahay sanatria.

    Nampidirin'i Malala13 25 Aog 2008, 16:38
  6. Manao ahoana Malala 13,
    Elaela izay. Ie, misy ny zava-mampalahelo isan-karazany é!.
    Miha jamban'ny filana sy ny fitsiriritana ny olona ka manao ny tsy fanao. Eny, na ny biby aza indraindray mbola...mifanahin'olona

    DdRb

    Nampidirin'i DadaRabe 25 Aog 2008, 21:20