VONY TS’ISY LAINGO

Nampidirin'i dadarabe | 30 Aog, 2007

Niherina ny volana, nivadika ny taona,
Efa lasa ela ny andro sy fotoana

Niaraha-nita rano

Tanaty anganongano,

Tanaty nofinofy,
Mateza sy marofy. 

Injany tampotampoka ! ilay rivotra miserana,

Manaitra ati-saina, mandrirotra fitserana,

Fa aiza angaha? Nahoana?

Ezahin-ko tsaroana,

Tadiavin-ko banjinina,
Tsy hita mba fihinina ! 

Fa iny vorona iny, raha lasa lavitra any !
Mba aiza loatra re no tany fiantefany ?
Dia lasalasa saina,
Nankaiza ilay nandraina ?
Oh !vony ts’isy laingo !
Mpametraka baraingo ! 

Nivadika ny taona, niherina ny volana,
Adino ireny mamy, adino koa ireo olana,

Tantara sisa… indrisy !

Tantara sisa… misy !

Kanefa anie fahiny,

Toa tondra-drano izy iny !

 

DadaRabe

La Charité

25/04/05  23:26


15 Hevitra & 0 Verindrohy (trackback) amin\'ny "VONY TS’ISY LAINGO"

  1. :-)

    Nampidirin'i ikalamako 30 Aog 2007, 23:59
  2. :-p

    Nampidirin'i DadaRabe 31 Aog 2007, 01:56
  3. Mba tena raharaha kosa izy izany koa! KA iza re no mety ho tsaratsara kokoa DadaRabe ê: vony ts'isy laingo sa laingo mena (manana endrika fa ny toetrany tsy madio, araka ny hira...)??
    Na izany na tsia, tsara araka ny mahazatra, ny asasoratrao.
    Nisy tohiny ve?
    Ryana

    Nampidirin'i Ryana 31 Aog 2007, 09:54
  4. Misy tohiny foana ny asa soratra kah. :-)

    Ny amin'ny laingomena indray dia marevaka, manodoka, mandondona, misloko maro (na mena aza ny anarany.

    Nampidirin'i DadaRabe 31 Aog 2007, 10:50
  5. miandry ny tohin'ny tantara izany izahay eto ê!

    Nampidirin'i Ryana 31 Aog 2007, 11:06
  6. Miandry ny tohin'ny tantara "indray miseho" ?
    Tena fanina be aho tompoko fa andraso ary é!
    (sahala amin'ny hoe spiderman 1, 2, 3 izany !)

    Nampidirin'i DadaRabe 31 Aog 2007, 13:05
  7. ianao ve no fanina sa izahay mpamaky? ianao anie nilaza, esty ambony, fa misy tohiny... avy eo, eo ambany (tsy misy 1 metatra akory) milaza fa indray miseho ilay tantara... tena fanina ny vahoaka, Tompoko.

    Nampidirin'i Ryana 31 Aog 2007, 14:25
  8. Ny tohin'ny asasoratra no lazaiko anao. Efa tamin'ny 2005 io no nosoratako. Dia mbola nitohy foana ny asasoratra hatramin'izao 2007 izao.
    Ilay tononkalo kosa dia tantara indray miseho nosoratan'i Vahandanitra (ilay mandeha sabotsy hariva) :-)
    Fa andraso ary hitadiavako tohiny é! toa an'i Rocky II, III, IV
    Izay mahafa-po ny mpamaky tompoko no atao.

    Nampidirin'i DadaRabe 31 Aog 2007, 15:42
  9. Tohiny ary é!

    Vony ts'isy Laingo
    mpametraka baraingo
    tontolo feno vony...
    nitsahatra namony !

    Nampidirin'i DadaRabe 31 Aog 2007, 15:45
  10. Vony ts'isy laingo
    Hoe saika asiako faingo
    Izaho mba kevokevoka,
    kinanjo lasa...teboka !

    Nampidirin'i DadaRabe 31 Aog 2007, 15:53
  11. tena mahery ianao ê!

    avadibadikao
    ny baraingo sy vony
    ny peninao injao
    mikorisa tsy mitony...

    Nampidirin'i Ryana 31 Aog 2007, 16:32
  12. Soava dia ianao, Tompoko. Dia ho tsara mandroso ho tsara miverina.
    Inoako fa ho BdB ny tononkalo hovoasoratra eny ambony eny mandritra ny 24 ora tsy mihato!
    :-D
    Ryana

    Nampidirin'i Ryana 31 Aog 2007, 16:41
  13. Mankasitraka e! Hitohy hanentana ato ihany na dia handeha aza e?
    Soava dia

    Nampidirin'i karako 31 Aog 2007, 17:10
  14. Misaotr'é!
    Tsy haiko raha ahita internety aho any Dago fa dia ho hita eo.

    Nampidirin'i DadaRabe 31 Aog 2007, 17:59
  15. Vony ts'isy laingo Tandapa lany haingo Fitia toa lany tsiro Fo toa maty jiro... Nampidirin'i Tsiky 31 Aog 2007, 21:20