NY ANARANAO RY RAIKO
Nampidirin'i dadarabe | 19 Jol, 2007Ny anaranao ry Raiko !
Kaloiko sy hiraiko,
Aloakako ato am-bava,
Vetsoiko lalandava.
Ny anaranao mahery !
Deraiko tsy an-tery,
Fa masina indrindra,
Ka tiako ahindrahindra.
Ny anaranao ry Tompo !
Manafaka toloko,
Raha vizana ny aiko
Na kivy koa ny saiko.
Ny anaranao ry Avo !
Hialofako raha lavo,
’Ty tenako malemy,
Miantso anao ombieny.
Ny anaranao tsy foiko,
Raiketiko ato am-poko,
Fa izy no harena,
Sy hany fandresena.
Ny anaranao ihany,
Antsoiko hatrany hatrany,
Fa hery hiantsampiako,
Inoako s’hitokiako.
DadaRabe
Marseille (17/03/00)
Nalaina tao amin'ny boky "Dia nisy ny mazava"
