MITANDREMA ISIKA !

Nampidirin'i dadarabe | 16 Aog, 2008


MITANDREMA ISIKA !

Mitandrema isika !
Ny tany diavintsika anie ka feno fikafika,
Feno fitapitaka...
Dia fotaka mandrevo sy loza miparitaka.

Mitandrema indry !
Fa sarotra ny lalana ary be ireo mody tia...
Mandangolago fatratra,
Kanefa dia mamingana, mamarina any an-tatatra.

Mitandrema letsy !
Fa misy ireo mitetika mamorona hevi-petsy
Dia mody tena namana,
Kanefa ny ao an-tsainy : handroba izay an-tanana !

Mitandrema foana !
Fa lasa ireny ora, mandroso ny fotoana...
Aza mitaredretra !
Fa ndrao dia tara loatra ka eo vao manetsetra !

Mitandrema isika !

DadaRabe
La Charité
18/12/06   08:03



30 Hevitra & 0 Verindrohy (trackback) amin\'ny "MITANDREMA ISIKA !"

  1. miarahaba dadarabe an

    elaela izy izany
    marina tokoa fa mila mitandrina, fa indrindra indrindra mitandrina mba hiaina "à fond" ny andro rehetra fa mandalo izao fiainana izao, sy mba tsy hisian'ny nenina any aoriana

    mirary soa

    Nampidirin'i maintikely 17 Aog 2008, 06:10
  2. Tena mila mitandrina tokoa fa ny fahavalo ratsy indrindra tokoa ange dia ireo mody namana ihany.

    Ary manahoana ny taiza ao aloha e?

    Nampidirin'i Lalasoa 17 Aog 2008, 07:58
  3. Miarahaba

    Maintikely, Lalasoa> ie ilaina tokoa eny amin'ny fiainana eny ny malina. "Ramalina aza hono mifehy hazo tokana".

    Ny taiza dia mihalehibe. Efa haka 5 volana. Vetivety é!

    Nampidirin'i DadaRabe 17 Aog 2008, 12:43
  4. ento milamina é :-)

    Nampidirin'i Kdaombaramita 17 Aog 2008, 18:23
  5. Misaotra dadarabe a

    Nampidirin'i Tokinao 17 Aog 2008, 18:43
  6. Entina milamina é!

    Ento mora ny lalao mbola ho el hoy Black Jack's :-)

    Nampidirin'i DadaRabe 17 Aog 2008, 19:58
  7. eka ouz ry DadaRabe.
    Milay fa miverina indray ny tononkalontsika, misaotra e !

    Nampidirin'i ikalamako 18 Aog 2008, 00:04
  8. Angaha hita ry Ikalamako à!

    Nampidirin'i DadaRabe 18 Aog 2008, 01:21
  9. Misaotra e!
    tena malma maina tokoa ny tany ka ny rano natsakaina indray ity no mamono!

    Nampidirin'i news2dago 18 Aog 2008, 12:03
  10. Dia mbola asiana black Jacs indray ry news2dago

    Mba tandremo kely lesy (2)
    ‘ty fiainana ity anie ka be fikafika
    Mba tandremo kely lesy
    Mitolona lery mba ho tafita
    Ny fandrika hiaraha-mahita
    Zaran’olona aza ialahy midaraboka dia any dia tsy hita

    Zandry a ! Ny tany anie ka malama maina
    Tsy ampy lesy ny mitaraina
    Mba tanora ve lery sao refa drodroka tsy manana hataina
    Zandry a ! Tsy vita tranga lela ny miaina a
    Tsy ampy lesy ny mitaraina
    Sao ny namana niarahana ela tafita, ialahy tonga saina

    Nampidirin'i DadaRabe 18 Aog 2008, 13:50
  11. Ry zatovo tsara feo,
    mitandrema ry zareo !
    sao dia lanin' vitsik'eo
    ilay tantely anikeheo...

    Nampidirin'i lehilahytsyresy 19 Aog 2008, 18:30
  12. Lehilahytsyresy>
    NAnkaiza ny tanteliko teto?
    Lanin'ny vitsika
    Vitsika inona?
    Vitsi-kambo..............

    Nampidirin'i DadaRabe 19 Aog 2008, 19:28
  13. Mihodikodina leisy
    Ity tanintsika ity :)

    Nampidirin'i pissoa 19 Aog 2008, 21:42
  14. Ka mahaiza fetsifetsy
    sao ialahy dia mikodia :-)

    Nampidirin'i DadaRabe 19 Aog 2008, 22:24
  15. Ho teneniko vetivety
    Sarotra ho ahy ny fahitana
    Fomba fanoratana metimety
    Apetrako ary , asa raha mety ?

    N'aiza , n'aiza
    Eto an-tany
    Tsy maintsy misy fikafika
    Misy manana hevi-petsy

    Tsy misy ahazoana ahiahy
    Mitandrina sy misava
    Miambona hatrizay
    Mba tsy ho latsaka ao an-davaka

    Tonga eto aho moramora
    Manantona anareo mahay
    Mpamorona tononkalo betsaka
    Fifalian'ny saina sy fanahy

    Nampidirin'i mianatra 20 Aog 2008, 20:35
  16. Mianatra>

    "N'aiza , n'aiza
    Eto an-tany
    Tsy maintsy misy fikafika
    Misy manana hevi-petsy "

    Misaotra ami'ilay tononkalo

    MArina mihitsy no lazainao. Tsy maintsy fetsifetsy ihany koa é!
    Dia mitandrina ihany koa amin'ny fahafetsifetsen'ny sasany.
    Sa ahoana ?

    Nampidirin'i DadaRabe 21 Aog 2008, 14:01
  17. Izay fetsifetsy mety manana
    Fiheritreretana milay
    Ahitana izay azo atao
    Andosirana ny fikafika

    Misy koa ireo mahay manambaka
    Raha mety ahazoany tombon-tsoa
    Indrindra ao amin'ny raharahany
    Fiasana, fivarotana, am-pividiana

    Amin'ny fiainana andavan'andro
    Sarotra ny ahafantarana ny olona
    Tena matotra, miseho ho namana é!
    Izany ve ry mpampianatra ?

    Nampidirin'i mianatra 21 Aog 2008, 16:57
  18. Mianatra>

    Be ny fetsy sy maranitra
    hila hanakatra ny lanitra
    ary tena nandrandraina
    Ka nitondra ny maraina

    Misy fetsifetsy lava
    sady mailamaila-bava
    Dia milaza izao sy izao
    Kay nataony izay natao

    Misy kosa mody bado
    Kay samborina tsy azo
    fa malama toy ny trondro
    mampianjera toa akondro

    Ka dia mailo foana hatrany
    Fombany ihany io eto an-tany
    Izay no izao tontolo izao
    SA ahoana hoy ianao ?

    Nampidirin'i DadaRabe 21 Aog 2008, 17:25
  19. Eny misy ireny mitady
    Tsy mahafantatra fa
    Ny lanitra, tsy eny ambony akory
    Fa ao anatin'ny fanahy

    Ny tsirairay, samy manana
    Izay fahitany ny marina
    Mino sa tsy mino fa
    Tena misy Azy ao anatintsika ao

    Izay manaiky an'izany
    Hitandrina ny namana
    Fa tsy anao fetsifetsy
    Sy hitondra fanjombonana

    Any manaraka indray ary
    DaDaRaBe ô!
    Misaotra
    Betsaka

    Nampidirin'i mianatra 21 Aog 2008, 19:59
  20. Mianatra,

    Ie, ny fanahy no olona
    Izy no mivonona
    hiady hisedra mafy
    na mangidy, na tsy tanty

    Raha noana anefa 'ty kibo
    na isika na ny gidro
    dia mivezy ny fanahy
    Ka manjary miahiahy

    Misy anefa ireo izay sahy
    manadala ny fanahy
    ka mivarotra ny marina
    ary maro no nivarina

    tsy dia ho be resaka aho
    fa diniho re izay atao
    fa malama anie ny tany
    Ianao mahafantatra izany

    DdRb

    Nampidirin'i DadaRabe 21 Aog 2008, 22:50