MANINA ANAO !

Nampidirin'i dadarabe | 30 Jan, 2008


Manina anao…

Dia eto manonofy ireny andro lasa…
Niarahana nidola,
Nitosy, nikotaba, nihira sy nikasa,
Niventy angolangola.

Ny lanitra fahiny toa manga aok’izany !
Dia rivotra madio…
Niritsoka, nitondra angano sy vinany,
…Nidify toa tadio !

Ianao ilay fitiavana, ianao ilay mazava,
Nitsilo ny haizim-pitoko,
Oh ! Volana baliaka, masoandro nampisava
Ny alina mikitroko.

Injao miraondraona ao anatiko ao
Ilay ako fahatsiarovana !
Kanefa tsy eo anilako fa lavitr’any ianao,
Ny foko anie torovana !

Dia nofinofy sisa ireny andro lasa,
Mangina ny ety !
Ianao tsy eo akory, ny foko toa maratra,
Tomany irery akia !

…Fa manina anao !

DadaRabe
Saint Pierre et Miquelon
30/01/08  10 :18


25 Hevitra & 0 Verindrohy (trackback) amin\'ny "MANINA ANAO !"

  1. aie aie aie, aza mitomany irery moa e ! Tsiky dia ampy hoy i sefo an !

    Nampidirin'i ikalamako 30 Jan 2008, 19:38
  2. tsy hoe aza mitomany ... fa aza mampitomany moa ry DadaRabe a ! hi hi hi.

    Tsara be, tena tsara fa mankasitraka hatrany mizara e.

    Nampidirin'i pissoa 30 Jan 2008, 19:43
  3. Ikalamako> Tsyiky dia ampya an ! :-)

    Pissoa>
    Aza tomany raha raha nindaosin'ny onja
    Ilay fanantenana ka nidify dia tsy hita
    Bodo

    Nampidirin'i DadaRabe 30 Jan 2008, 20:28
  4. .

    Nampidirin'i Tokinao 30 Jan 2008, 20:55
  5. Mankasitraka tokoa dadarabe a! mahafinaritra ilay izy.

    ( nosoratako tao anatin'ilay hoe "votoatiny" ny hafatro tetsy ambony dia lasa tsy hita kay )

    Nampidirin'i Tokinao 30 Jan 2008, 20:57
  6. Tokinao> Nisy soratra ihany io fa "teboka" :-)
    Indraindray anie "teboka" iray fotsiny dia mahalasa zavatra maro é!

    Misaotra é!

    DdRb

    Nampidirin'i DadaRabe 30 Jan 2008, 23:28
  7. Azo atao hoe tohiny sa mialoha angamba ity soratsooatro ity...
    ------------

    IANAO FOANA

    Efa nofehezina ny eritreritra tsy ho any,
    Niezaka ny hanadino;
    Ary dia namehy tena tsy hisaina na hanontany
    Hoe nahoana ny foko no mbola mino;
    Saingy ny anaranao
    Sendra henoko niserana
    Dia ampy nampisavoara tsotra izao
    Ny atifoko, tsy hay noferana…

    Efa mba nisikina hery ka namadika ny pejy,
    Ny amintsika? Efa vita;
    Niezaka nanary dia; nivenjy teny, nikarenjy
    Niova làlana, niampita…
    Saingy kalo iray izay,
    Hira sendra tao am-bavako,
    No nampahatsiahy ahy indray
    F’ianao no hany tiako ho havako!

    Dia nanandrana nitia, nofolahina ny fo
    Hahay hiresaka, hitafa;
    Satry hiloka ny ho doria, te hanaiky an-tsitrapo
    Fa misy anie fitiavana hafa;
    Kanefa toa mbola ianao
    No notadiaviko tao aminy,
    Ny endrika sy toetranao
    No nomeko azy mba hindraminy…

    Nataoko avokoa izay rehetra azoko natao,
    Mba ho foana ny tsiaro;
    Na ny mamy na mangidy, notohofako hatrizao
    Ny tsara sy ratsy koa naharo;
    Saingy tsapako etoana
    Fa hery very maina ny ahy,
    Ianao tsy haiko hohadinoina,
    Am-po, an-tsaina, am-panahy…

    Ryana
    (29/01/08)

    Nampidirin'i Ryana 31 Jan 2008, 09:22
  8. clap clap clap Ryana !

    Nampidirin'i ikalamako 31 Jan 2008, 09:29
  9. ndryyyyyy fa dia manina an'iza loatra re izy zany e

    Nampidirin'i sazykely 31 Jan 2008, 12:18
  10. Ryana>Tsara ny vetsovetsonao.
    Mahafinaritra. Tohizo hatrany !

    sazykely> Tononkalo é!

    Nampidirin'i DadaRabe 31 Jan 2008, 12:31
  11. "Ny lanitra fahiny toa manga aok’izany !
    Dia rivotra madio…
    Niritsoka, nitondra angano sy vinany,
    …Nidify toa tadio !"

    Ilay Fitiavana manainga antsika hijery ny manodidina koa an !
    Dia ny tontolo iainana koa lasa niova ! Sa isika no miova ?

    Tena na tsy "manina" aza dia mety mba ho tsapatsika ihany fa TENA MIOVA ny tontolo iainana e !
    Indrindra moa fa ny "rivotra" lasa maloto, tsy mitondra vetso kanto intsony fa ngenongenona toa (aie ! aie ! aie! mba maimbo koa izy izany an !)

    Ny mpanoratra tena mahita zava-maro mihintsy rahefa lasa izay ny "feeling" an ! Tena tsy voatery hifokafoka irony zavatra hafahafa irony foana akory an !

    MAHEREZA e ! Fa Haingana ny fandehan'ny andro sy ny alina koa ianao indray no ho gaga fa "Ary toa efa handeha hanamboatra entana indray kanefa toy vao omaly no tonga !..."
    Grave koa anie ny hatsiaka any aminareo ka tsy mahagaga raha lasa vinany ny sasany e !

    Mankasitraka DdRb o !

    O.H.

    Nampidirin'i RAMANATANTARA 31 Jan 2008, 14:18
  12. Ramanatantara> Ie, mihazakazaka tokoa ny fotoana ry tsy hitahita akory....

    Ny tontolo iainanatsika dia mampisy akony amin'ny fiainantsika ihany koa !

    Mankasitraka é

    DdRb

    Nampidirin'i DadaRabe 31 Jan 2008, 14:36
  13. Tehaka be Ryana !!!

    Nampidirin'i pissoa 31 Jan 2008, 14:52
  14. MIsaotra an'i Pissoa, henoko manako hatraty ny tehaka!
    Ryana

    Nampidirin'i Ryana 31 Jan 2008, 14:57
  15. HAy koa moa Ikalamako mitehaka ho ahy, azafady fa adinoko. HAy izay no mampanako azy koa!
    Mankasitraka ê!

    Nampidirin'i Ryana 31 Jan 2008, 14:58
  16. Manako manako
    Ry Ikalamako !
    Tehaka redona tsy mihato !
    Doboka amponga any dilam-bato

    Manako manako
    Ry Ikalamako
    Manao dihy soraka soa milanto
    Izy ka gasy ary mpanakanto !

    DdRb

    Nampidirin'i DadaRabe 31 Jan 2008, 15:33
  17. hi hi hi sa ndryiii ry tony ?
    Mampisento ilay "manina" fa iretsy hevitra mampihomehy kely.
    Fa mahafinaritra daholo raha aravona.

    Nampidirin'i Tsikisariaka 01 Feb 2008, 08:39
  18. tsara ny zavakanto e

    Nampidirin'i news2dago 01 Feb 2008, 09:41
  19. Tsikisariaka> Mandravona an ! mety kah ! misaotra anao foana.

    news2dago> tsara ny zava-kanto dia tsara koa ireo ...news é!

    Nampidirin'i DadaRabe 01 Feb 2008, 13:29
  20. Aza kivy na mivaona
    Fa ianareo mbola hihaona.
    Ireo hazakazaka sy tsiky fahiny
    dia zary tadidy ankehitriny
    Mifono hery tsy hay tohaina
    Mampitoatra tsy hay zakaina
    Raiso antsary ilay fifankahitana
    Hitombo hatrany anie ny fiarahana
    Ireo Vavaka mangina tsy re feo
    Tohizo hatrany tsy ho toreo!

    Nampidirin'i Soanja 02 Feb 2008, 23:35