ZAVA-POANA...

Nampidirin'i dadarabe | 2 Jol, 2009

 

"Zava-poana dia zava-poana, hoy ny mpitoriteny, eny, zava-poana ny rehetra !" (Mpitoriteny 12:8)



Indraindray ny fahanginana...
Manjary misy feo
Anaty toa tsy heno,
Nefa toa milaza
Anaty saina lalina,
Anaty fo fanahy,
Fa velona efa ela,
Hatram’fahagola
Ilay feo, eritreritra...
Mandalo ao tsy hita,
Sarotra takarina,
Kanefa dia manjaka
Amin’ny fiainanao.
Mitondra hery miafina,
Mitondra fifaliana,
Mitondra alahelo,
Toy ireny rano
Koriana an-tendrombohitra,
Tsy misy mahatohitra,
Firiavan’ireo vorona,
Firiavan’ireo biby,
Firiavan’ireo trondro,
Mamelona ny voahary.
Anaty fahanginana
Misy feo milaza :
Mandalo ny fotoana,
Mandalo ny rehetra,
Mandalo ny fiainana,
Mandalo avokoa...
Ary zava-poana
Izao rehetra izao,
Zava-poana koa
Izay rehetra vita
S’izay mbola kinasa,
Ny ora fahanginana
Dia zava-poana koa.

DadaRabe
La Charité
19/05/05  17:26

 


25 Hevitra & 0 Verindrohy (trackback) amin\'ny "ZAVA-POANA..."

  1. Aiza kosa izany hoe :
    Zava-poana izao rehetra izao
    Sy ireo vita s'izay mbola kinasa.
    Mety ho heverina toy izany
    Fa nahakivy ireo zava nitranga
    Ny fanasimbana sy fipotehana
    Ny asa efa vita
    F'angà rehefa nisy nanimba
    Dia avela eo fa kivy
    Ka tsy hitsangana hanamboatra
    Izay rava !
    Tsy misy zava-poana ry namana
    Jereo tsara, diniho,
    Ny fanaovan'ny zava-boahary
    Mandritra ny ririnina
    Mangina ny rehetra
    Tsy hita ny ataony
    Nefa miasa ny ao anatiny
    Mikarakara ny ho avy
    Ho hita anie ny zava-bitany
    Rehefa tonga ny lohataona
    Ny vokatry ny asany tao Fahanginana.

    Nampidirin'i mangamaso 02 Jol 2009, 22:20
  2. Indraindray ianao
    milaza zava-poana
    dia ny hita-maso
    azo tsapain-tanana
    fa misy ny fotoana
    ilazanao finoana
    sy fanantenana
    ary ampitso mamy
    dia volana tantely
    sy kanto ts'hita isa
    izany no fiainana
    sy lalana isan'andro
    mifandimbindimby
    ny mamy sy ny ngidy

    Ny zavatra rehetra samy manana ny fotoany avy, ary samy manana ny androny. Hoy ny mpitoriteny (3:1)

    Nampidirin'i DadaRabe 03 Jol 2009, 11:06
  3. Izany no mahasoa ny tononkalo sy ny famoroana tantara, mahafaka milaza zava-poana ry DadaRabe a !
    (Tsy azo tsapain-tanana daholo izay hita maso kah ! :-).

    Nampidirin'i mangamaso 03 Jol 2009, 13:03
  4. misaotra e!

    zava poana tokoa nefa de tsy foy ery izy ity

    Nampidirin'i news2dago 03 Jol 2009, 13:37
  5. Eny ho'aho ry mangamaso
    ny tononkalo sy tantara
    dia ahafahana miala
    vetivety monja ihany
    ilay fiainana an-tany
    izay kodiaran-tsarety
    dia ny tsara sy tsy mety
    mifandimbindimby eo
    izay no zavatra miseho
    soa fa nisy tononkalo
    sy tantara iray mandalo...

    Nampidirin'i DadaRabe 03 Jol 2009, 14:51
  6. News2dago> zava-poana fa sady mamy no tsy foy an ! :-)
    Izay ilay fiainana é!

    Nampidirin'i DadaRabe 03 Jol 2009, 14:52
  7. Eny, zava-poana tokoa izao rehetra izao: na ny vola, na ny harena ... Na ny bika sy hatsaran-tarehy ... Na ny haja amam-boninahitra. Taonjato iray monja ... dia lasàna ho lavenona avoko. Iray ihany no tsy miova, dia ilay mpamorona an'izao tontolo izao : ilay MANDRAKIZAY.

    Nampidirin'i Tokinao 03 Jol 2009, 16:52
  8. éphemère !!!

    rehefa maty dia
    tsy misy intsony
    na tamingana iray
    ilay nokatsahinao
    mafy fahiny tao anatinao.
    Toa ho ratsy ary
    izay fahatsiarovana tavela
    raha tsy amim-panajana no nahazoana izao tontolo izao.

    Tontolonao noheverina
    hampiakatra ny voninahitrao
    anefa ka kajio
    tsy ho voaloton'ny anio.

    Nampidirin'i kdaombaramita 03 Jol 2009, 19:58
  9. Tokinao> Voasoratra hoe : "ny lanitra sy ny tany ho levona, fa ny Teniko tsymba ho levona". Mandalo ny rehetra ety ambany masoandro.

    Kdaombaramita>
    éphemère
    sy hianjera
    ny rehetra
    rehefa fetra
    ka tantara
    any am-para
    ny tontolo...
    nisy hono !

    Nampidirin'i DadaRabe 04 Jol 2009, 00:05
  10. Izay eo am-pelatanana...
    dia toa ohatry ny zava-poana.
    Fa ireo zavatra tsy ananana...
    dia mampilendalenda foana.

    Rehefa azo avokoa anefa ireo,
    vetivety ihany dia mankaleo.
    Ka injay indray mibitsika ilay feo:
    hoe: "omeo hafa indray fa zava-poana ilay teo".

    Nampidirin'i lehilahytsyresy 04 Jol 2009, 12:13
  11. Lehilahytsyresy>

    Ny dobo tsy hita hono
    No tena mahamanina !
    Fa toa tsy fy atono
    Ny trondro eny an-tanana.

    Ireny voa tsy hary…
    Matsiro sy mafilotra
    Fa ny eny an-tanimbary,
    Matsatso toy ny fingotra.

    Loza fa izany
    Mazàna no ety !
    Izay vaovao hatrany
    No betsaka mpitia !

    DdRb

    Nampidirin'i DadaRabe 04 Jol 2009, 13:57
  12. Fa ireo taloha…
    Dia lasa nankaleo
    Arora sy aloa…
    Oh ! zava-poana avy eo !

    Nampidirin'i DadaRabe 04 Jol 2009, 13:58
  13. Izany mihitsy
    Ny fomban-olombelona
    Noana foana, tsy mahita voky
    Mitady hanakatra tohatra
    Tsy mijanona naha misy maty
    Ahitany fafinaretana sy voninahitra
    Fialonana no mameno ny fo
    Ka tsy maintsy tafita ko'
    Zava poana hono ireo taloha...
    Oviana ny manaraka ?
    Ho avy tsy ho ela,
    Ho zava-poana koa.

    Nampidirin'i mangamaso 04 Jol 2009, 16:33
  14. Mangamaso>

    Ny fomban'olombelona
    dia tena mahadomelina
    kanefa ohatr'izany
    tsy atao hampitomany.
    tsy mety voky mihitsy
    kanefa tsy mitsitsy
    mirobaroba foana
    ka isan'andro...noana
    Dia mialona ny hafa
    mifosa raha mitafa
    indrisy mahonena
    maty aho ry firenena !

    DdRb

    Nampidirin'i DadaRabe 04 Jol 2009, 16:56
  15. Dadarabe ô, aoka,
    sao maro ny mitroatra
    vaky ilay nafenina
    ka sao mipenipenina.
    Zava-poana foana,
    no hany mba tadiavina
    ny eo tsy mety loaka
    ny hafa no takarina

    Na tsy mendrika ary
    izato fomba, toetra,
    "tsy zava-poana" hono io
    nefa hita nangalarina.

    Tsy henatra tsy tahotra
    mivandravandra maso
    anoloan'ny vahoaka
    nitondrana ankaso.

    Raha zava-poana iky
    ry tanora malagasy
    ialao aza mitsitsy
    sao hanenenana ihany.

    Nampidirin'i kdaombaramita 04 Jol 2009, 18:34
  16. Kdaombaramita ô
    Be ireo mihiakiaka
    Ireo tanorantsika
    mitady tsy mahita

    fa toa manenjik'aloka
    matetika voadaroka
    fa sendra ady sarotra
    izay mahavaky takotra

    Mivandravandra maso
    mahita ny ankaso
    mamely tsisy andraso
    tomany sy mikatso

    Fa zava-poana mantsy
    raha toa ireny antsy
    ka dombo tsy mamantsy
    ts'ilaina f'efa ratsy

    ka dia mahereza
    ny aina no hateza
    fa lalana mideza
    ny fahavalo ngeza !

    DdRb

    Nampidirin'i DadaRabe 04 Jol 2009, 19:04
  17. Misaotra betsaka fa tena mampahatsiahy ny voalaza ao @ Mpitoriteny (Ecclesiastes) toko voalohany sy toko faharoa mihitsy ireto lohahevitra naroson'i DadaRabe ireto.

    Nampidirin'i lehilahytsyresy 05 Jol 2009, 09:30
  18. Lasa poety vinany mihitsy miresaka aminao ity marina ! ha ha ha !

    Nampidirin'i Kdaombaramita 05 Jol 2009, 11:36
  19. Vita ny fisaintsainana tao (Ecclesiastes)
    Manaova herinandro sambatra daholo e!

    Nampidirin'i mangamaso 05 Jol 2009, 12:34
  20. Lehilahytsyresy> ie, mahalasa saina indraindray ny voasoaratry ny mpitoriteny.
    "vanitas vanitatum omnia vanitas". Zava-poana ny rehetra !

    Kdaombaramia> Sao dia efa ao foana ilay maha-poety anao fa manomboka mifoha fotsiny ? ;-)

    Nampidirin'i DadaRabe 05 Jol 2009, 12:37