TANTARAN’NY ANDRO LASA

Nampidirin'i dadarabe | 9 Okt, 2007

Avadiko ireo pejy, tantaran’ny omaly…
Fitia natao tsy ho ritra,
Jereko ireny sary, vakiako ireny diary…
Toa mavomavo sisa !
Tantara hafahafa !
Tantaran’ny andro lasa !

Dia lasa ny vinany sy embona tsy haiko,
Angamba tsy fitia !
Mifandrirodrirotra ny ao anaty saiko
Ka verivery dia…
Nisy ve izany ?
Sa nofy fotsiny ihany ?

Fitiavana fahiny toa afo tsy ho faty,
Nananika ny lanitra !
Nirehitra aok’izany, nijoalajoala mafy !
Toa tsy ho lany manitra !
Fa tokana sy iray…
Fitia mandrakizay !

Niriotra hadalana, niroso am-pahajambana,
Tsambikina dia lasa…
Tsy nisy nahasakana fa ony migodana,
Riana sasasasa !
Kinanjo singam-bolo…
Dia rodana daholo !

Dia pejy vitsy sisa, tantaran’ny omaly…
Fitiavana efa ritra,
Narakitry ny diary, mipetraka ho sary…
Nanjary pitrapitra !
Tantara efa voasasa...
Tantaran’ny andro lasa !


DadaRabe
St Pierre et Miquelon
07/10/07 12:24


17 Hevitra & 0 Verindrohy (trackback) amin\'ny "TANTARAN’NY ANDRO LASA"

  1. efa any Saint-Pierre tokoa angaha i Dadarabe ???
    Eh embona sisa tavela, fanontaniana sisa mipetraka, pitrapitra sisa rehefa avy nandalo an'Ambatovinaky-Ambohijatovo-Anjohy-Andohalo.
    Nilaina hatao essence izany ry DadaRabe o ! Fiainana e...

    Nampidirin'i ikalamako 09 Okt 2007, 21:33
  2. R'IKALAMAKO !

    Indrisy mantsy ry Ikalamako !
    Doboka am-po sisa ireo lamako,
    Nilaozana inona moa no atao ?
    Ka dia ny tsetsetra no misy izao !

    Eto St Pierre aho ry Ikalamako !
    Betsaka ny olana ho vahako,
    Ny fiainana anie ka tsy moramora !
    Ny havanareo koa migoragora !

    Izany sy izany ry Ikalamako !
    No manjo ity namana tato ho ato,
    Soa f'ombalahy efa ngeza vozona
    Ka n'inona olana dia efa vonona !

    Izay fa veloma ry Ikalamako !
    Raha diso aho dia aza toraham-bato !
    I DadaRabe anie ka mandia tany...
    Mety ho solafaka foana ihany.

    DadaRabe
    09/10/07

    Nampidirin'i DadaRabe 09 Okt 2007, 21:53
  3. TSara (araka ny mahazatra) ny tononkalonao ry DadaRabe â! Mba apodiko aminao ny fanontaniana : angano angano izy io sa tena izy? niainanao sa hitanao?
    Na izany na tsia, tsara ê!
    Ryana

    Nampidirin'i Ryana 10 Okt 2007, 08:10
  4. Hahaha !
    sady anganongano, no hitako, no tena izy.
    Na izany na tsia, misaotra foana é!
    DadaRabe

    Nampidirin'i DadaRabe 10 Okt 2007, 11:10
  5. Haingam-pandeha anie ianareo izany !
    Izay sahady ve dia efa tonga any ?
    Nandeha fusée sa nandeha rôpilàny ?
    Toa voatety daholo manerana ny tany !!
    (hi hi hi ...Izaho mba mananihany)

    Nampidirin'i lehilahytsyresy 10 Okt 2007, 11:29
  6. Tsy hoe haingam-pandeha,
    Na koa mandeha fusée,
    Fa tototry ny adidy,
    Tsy manana safidy,
    Ka naka rôpilany,
    Dia any lavitra any,
    Mandefa tononkalo,
    Mitsiky, tsy mimalo !
    :-)

    Nampidirin'i DadaRabe 10 Okt 2007, 12:11
  7. DadaRabe o, ny tena moa tsy mba poety toa anareo fa iny Clarisse Ratsifandrihamanana hamaly amin'ny anaran'ikalamako (lol, mpisolovava ambony dia ambony) : Fantatro ... (Salohy p17) Raha folaka tanteraka ny lelan'ny angady Fa tohatra ny vato, Fantatro ianao fa vonona hiady Tsy manaiky hiato : Hiezaka hisetra ny zava-manindao, Manomboka hanefy angady vaovao. Raha safotry ny rano ny vary hojinjaina, Nijojo izany orana, Fantatro ianao fa tsy hiferin’aina Na hangorangorana. Hitraka avy hatrany hitsikin-kerimpo, Eny,hamafy indray, handatsaka ny voa. ...Raha tafakatrao izay efa bobongolo; Raha tafarinao ireo kisolasola, Eny sombinaiko, ny fikirizanao, Ekeko, eny ekeko, mitomban-dahy ianao. (mino aho fa tsy tena diso be ilay izy fa efa tsy tadidy tsara intsony) Nampidirin'i ikalamako 10 Okt 2007, 13:10
  8. Iny ikalamako hindrana an'i Clarisse Ratsifandrihamanana hamaly an'i DadaRabe, fa tsy mba poety moa ny tena (sady tsy "ety" no tsy "malalaka" :-D)

    Fantatro ... (Salohy p17)

    Raha folaka tanteraka ny lelan'ny angady
    Fa tohatra ny vato,
    Fantatro ianao fa vonona hiady
    Tsy manaiky hiato :
    Hiezaka hisetra ny zava-manindao,
    Manomboka hanefy angady vaovao.

    Raha safotry ny rano ny vary hojinjaina,
    Nijojo izany orana,
    Fantatro ianao fa tsy hiferin’aina
    Na hangorangorana.
    Hitraka avy hatrany hitsikin-kerimpo,
    Eny, hamafy indray, handatsaka ny voa.

    ...Raha tafakatrao ny efa bobongolo
    Raha tafarinao ireo kisolasola
    Eny sombinaiko, ny fikirizanao,
    Ekeko, eny ekeko, mitomban-dahy ianao.

    (mino aho fa tsy diso be, fa efa tsy tadidy tsara intsony)

    Nampidirin'i ikalamako 10 Okt 2007, 13:14
  9. Misaotra an'iIkalamako amin'ny tononkalo. Tsianjery izany no itadidiavanao azy an !
    Efa novakiako efa elabe io tononkalo io fa raha tsy nalefanao teto dia tena adino tanteraka.

    Misaotra é!

    Nampidirin'i DadaRabe 10 Okt 2007, 13:57
  10. Raha izaho no mpanoratra tantara dia ataoiko mifampitohy ireo tononkalonao roa ireo.
    Dia mahagaga raha tsy misy ifandraisany.
    MEty hanaovana boky kely mihitsy , amidy atao tovana amin'ny boky tononkalonao.
    Sa ahoana hoy ianao?
    :-)
    Ryana

    Nampidirin'i Ryana 14 Okt 2007, 15:37
  11. Tantaran'i Lemizo sy Bilakarenjy ve dia hitohy na dia samy i Lolo ihany aza no namorona é!
    Lalina koa itony manam-pahaizana itony kah !
    Ampianaro aho fa tena very foana é!

    Nampidirin'i dadarabe 14 Okt 2007, 16:13
  12. hahahah
    Ka i Bilakarenjy anienipetraka teny ankaikin'ny tetezan'i Bekiraro koa ê!
    Ary ny tanimbary lovan'i Bilakarenjy dia eny amin'iny akaikin'ny Route digue iny...
    hahahahhahaha
    mipao-tsatroka ny tenanay ê!
    Ryana

    Nampidirin'i Ryana 14 Okt 2007, 16:17
  13. Raha izay dia ekeko koa hoe tantara iay ihany ny tantaran'i Tintin et Milou sy Boul et Bill saingy tsy nifanena ry zareo tao anaty boky.
    Mahay zavatra itony tanora ankehitriny itony kah !
    Variana ihany izahay efa mahazoazo taona.

    Nampidirin'i dadarabe 14 Okt 2007, 16:35
  14. MIsaotra, Tompoko.
    Raha ianao no mahazoazo taona, izahay izany efa tsy hay lazaina intsony...
    Mankalaza ê!
    Ryana

    Nampidirin'i Ryana 15 Okt 2007, 09:04
  15. Aza maika, aza maika vao tanora erotrerony io dia maika sahady.
    Ho herinandro vaovao sambatra é!

    Nampidirin'i DadaRabe 15 Okt 2007, 11:23
  16. Tsarà, Tompoko!
    Ryana

    Nampidirin'i Ryana 15 Okt 2007, 17:09
  17. Tsy misy milaza hoe "tsarà" aza moa miezaka ny ho hanatsaratsara aina maika fa...
    Misasotra tompoko

    Nampidirin'i DadaRabe 15 Okt 2007, 17:16