DadaRabe " Tsy amidy ny fanahy"

NY VARAVARANKELINAO (Tononkalon'i DOX)

dadarabe — Wed, 26 Aug 2009 22:57:03 +0300

Mandalo eo matetika aho, dia manjary fahazarako
Ny mahita anao mitazana eo am-baravarankely
Fotoana fohy fifaliako, fotoana fohy fahasambarako
Eo ny endrikao mitsiky, mitsikitsiky toa anjely.

Mandalo eo matetika aho dia mitraka hatrany hatrany,
Mino fa hahita anao, dia mahita anao tokoa !
Tsy hita intsony ny hafaliako sy hasambarako amin’izany
Fa manenika fanahy, mahatototra ny fo…

Andray izay fahatairako, nandalo teo aho izao…
Nikatona àry fa nahoana, ny varavarankelinao ?
Nitanondrika ny fo, ny fanahy nangenahena…

Nanohy nandalo ihany aho, tsy nivoha hatramin’izao,
Angamba tsy hivoha intsony, ny varavarankelinao.
Mitanondrika ny fo, manomboka tsy hanantena.

Dox

INDRISY MANTSY RY MALALAKO (Tononkalon’i MIRANTSOA)

dadarabe — Thu, 20 Aug 2009 02:44:46 +0300

"Indrisy mantsy ry malalako"
Hoy ianao niteny,
"Tsy haiko ny hanakatr'
Ireny anatrao ireny"
Dia nikimpy izy nandroso
Nandao 'lay olon-tiany
Ka nikatona ny pejy,
Narakotra ho fahiny.

Dia hitomany izy anio,
Hangina tsy hiteny
Fa takona endrika avokoa
'Zay rehetra nojereny.

Valabalaka ny sainy
Mieritreritra ny ampitsony,
'Zay tsy hita vodilanitra
Amin'izato maso ditsony.

Aiza no tandrifiny?
Iza no anjarany?
Niserana azy ireny
Fa tsy fantatra ny anarany

Ka hitomany izy anio,
Hirakotra alahelo,
Ny ranomaso latsaka …
No hapetrany ho avelo.

MIRANTSOA
Antananarivo

Adala hoy aho (Tononkalon'i Pissoa)

dadarabe — Tue, 29 Jan 2008 17:24:49 +0200

Adala hoy aho ny manina,
Adala ... matihanina !
Fa na ny alina mikitroka
Na ny andro mibalika
Na ny hariva misariaka
Dia taratra, mandifotra
Ny masony jambena
Ny maitso - fotsy - mena.

Adala tsy ho sitrana,
... Sa adala manam-bintana ?
Fa ny rano mikoriana
Eny andohasaha eny,
Heveriny ho miteny !
Fa ny tena mahasondriana
Dia mpitondra hafany hono
Iry volana eny ambony.

Adala mora jemby,
... Sa adala very remby ?
F'iry tendrombohitra aza
Tiany atao ampihimamba !
Raha azony natao angamba
Efa novidiany, ho azy ;
Fa eny hono mety ho tazany
I Gasikara tanindrazany.

Adala hoy aho ny manina.

Pissoa (27 Janoary 2008)

ANY HO ANY… (Tononkalon'i FeNoTia)

dadarabe — Fri, 16 Nov 2007 01:13:33 +0200

Any ho any ilay tsy foiko
Ilay nandrimbona ny foko
Izaho aty toa olom-bery
Lasa olo-manirery

Any ho any ilay sakaizako
Ilay tsy foiko sady taizako
Namborahako fitiavana
Teny an-tsaha maitso mavana

Any ho any koa ‘lay tsiky
Tsy adinoiko raha mikimpy
Mibaliaka raha mihiratra
Masoandro hafa iray mamiratra

Izaho aty dia lasa saina
Fa toa reraka ny aina
Mahatsiaro anao hatrany
Ka mandefa ny vinany

Saingy indrisy, tsy ho tafita
Ilay fitiavana tsy ritra
Ilay fitiava-nokinasa
Dia natolotrao ny hafa

FeNoTia
Bujumbura
11/07/2007 20:45

MANJA BE NY MASONAO (Valin-tononkalon'i Tiana Valisoa @ tononkalon'i DadaRabe NY MASONAO)

dadarabe — Tue, 13 Nov 2007 22:35:46 +0200

Manja be ny "masonao", maha-te hihirahira
Tononkalo feno hery
Manja be ny "masonao", sady mamy no masira
Manamaivana ny fery.

Rakotr'ando izao ny masoko, vontovonton'ny tomany
Nofefena tsy hijery
Ankehitrio anefa liana, te-hahafantatra izany
Olon-tiana, tsy irery.

Tiana Valisoa
Jolay 2007

NY MASONAO...

Ny masonao no hitarafako
Ny ampitsoko tsy fantatro,
Ary ireo no hibanjinako ny lalana hombako,
Sy ny savorovorom-piainana tsy afaka raràko,
Izy no aiko,
Ka lazaiko.

Ny masonao no masoandro,
Manazava ny atoandro,
Sy ny alina mangina izay mibaby nofy mamy,
Sy ny fiainako sondriana ary manantena hatrany,
Satry foana!
Ho eo an-taona !

Ny masonao no hitsiloako
Ny haizim-pito tato am-poko,
Ka nanjary fifaliana no nameno ny tontolo,
Safononoka sy mihira antsa mirana daholo,
Voninkazo,
Tsy halazo.

Ny masonao no hany mamy,
Ka na ho maizina ny androany,
Dia hinoako sy antenaiko fa ho rahona mandalo,
Toy ny sery izay manembana ny vazo sy ny kalo,
Manavao...
Ny masonao !

DadaRabe
Aix-en-Provence
12/12/02 20 :23