DadaRabe " Tsy amidy ny fanahy"

TSAROVY !

dadarabe — Sun, 06 Sep 2009 04:14:38 +0300

Raha hitanao indray mihiratra ny andro,
Mazava ny masoandro,
Tsarovy ireo maraina…
Niarahana niria, nahamirana ny saina.

Raha tsinjonao ny hariva miritsoka mangina,
Tsioka mahasondrina,
Tsarovy ireny kalo…
Niarahana nihira, nivetso dia nandalo.

Raha tazanao ny volana, misosa eny ambony
Dia dify tsy hita intsony,
Tsarovy fa any ho any…
Izaho koa mahatsiaro…tantaratsika izany !

DadaRabe
06/09/09

ILAY VARAVARANKELY (Valin-kira ho an’i DOX)

dadarabe — Sun, 30 Aug 2009 00:28:43 +0300

ILAY VARAVARANKELY (Valin-kira ho an’i DOX)

Fahazaranao ny mandalo eo sy mitazana azy
Dia mamazivazy…
Sy mankafy ny hakantony…fahasambaranao,
Anjely milalao,
Mitsiky ka mitsiky,
Tsy aritrao mihitsy !

Dia tena safononoka, salanitra hatrany
Ianao tamin’izany !
Dia faly sy efa nino fa haharitra ombieny
Ilay varavarankely
Fitsinjonao mazàna…
Oh afo mpanafana !

Kinanjo tampotampoka nikantona sy nihidy,
Nanjary nampangidy
Ilay varavarankely ka tankina ianao…
Tsy hita izay natao !
Tanondrika nivena
Sy nangenahena.

Moa niova lasy izy dia any tsy hita intsony
Nanidina ny fony ?
Sa lasana nisinda satria mpandalo ihany
Namonjy ny akany,
Ka varavarankely
No sisa manirery ?

Dia gina ianao nijery
…Ilay varavarankely !

DadaRabe
27/08/09

AZA KAROHINAO

dadarabe — Mon, 03 Aug 2009 12:38:20 +0300

Aza karohinao izay momba ny fiainany,

Na ireo fanaintainany

Na ireo fifaliana afeniny ao am-po,
Tandroviny tokoa
Ka tsy tiany aseho
Sy tsy asiany feo.

Aza anontaniana ireo tsiambaratelo
Izay hitanao mihelo
Ao anaty masony kanefa dia koboniny
Fihininy, tazoniny
Satria izay no sitrany…
Tsy fantatrao ny dikany !

Aza vinaniana ny anton’ireo tsiky
Nihelina dia dify…
Sy ny hevitry ny teny naloakany tsy nahy,
Nateliny indray
Dia nihery tao am-pony…
Tsy ho henonao intsony !

Aza fongarinao ny rakitry ny ela
Tsy foiny ho an-tserasera,
Aza takarinao ny ampitso feno nofy
Iondanany an-toky…
Fa eo izy androany
Dia tiavo fotsiny ihany !

DadaRabe
16/07/09 0 :00

NY NOFINOFINAO

dadarabe — Sat, 11 Jul 2009 14:32:38 +0300

Ny nofinofinao no entiko miaina
Sy entiko misedra ny andro be migaina
Ary ireo hariva mangitsy, mamanala…
Ekeko an-tsitrapo, lalaiko tsy an-kisala,
Ventesiko raha alina,
Any an-torimaso lalina.

Ny nofinofinao no lasa fitsinjovako
Ny androko ampitso… Ary fitsilovako
Ny haiziko mikitroka nezahiko hazava,
Mitantana ahy hitraka, fanilo mampisava,
Mpitondra ny maraina,
Mpamelombelona aina !

Ny nofinofinao no sisa nofinofiko,
Mampihiratra ny saiko, manafaka ny rofiko
Ka entiko miampita ny ho avy mistery
Fa ny ahy ireny nofiko, nisinda sy efa very…
Nalevin’ireo jaly,
Nindaosin’ny omaly !

DadaRabe
10/07/09

AVIA ETO ANILAKO !

dadarabe — Tue, 30 Sep 2008 14:43:09 +0300

AVIA ETO ANILAKO !

Ry tiako,

Eny mety ho henjana ny fiainantsika akia !
Misy ny tsy rariny, misy ny tsy tia,
Ny lalana diavina tsy mora foana koa,
Ireny faniriana dia maro no tsy to !

Tsy mora koa angamba ny miara-dalana amiko !
Fiakarana, fidinana, tsy lapa ny anie akaniko !
Fa ny hanina anio aza tadiavintsika androany…
Ireny zava-tiana, toa nofinofy hatrany !

Indraindray akia tomany no kalo mba hiraina,
Niatrehina ireo ora sy andro vao maraina,
Fa maro ireo mafaitra, vangongo ireny ngidy…
Toa tongatonga ho azy, mandratra tsy safidy !

Kanefa eo ianao, mijoro, tsy mirona,
Mifampitantana amiko, miandry izay midona,
Vonona hiatrika ny ampitso fanantena,
Mifofotra, mikikitra, mitraka, tsy mivena !

Tsy ny orana mirotsaka no hahakivy antsika !
Tsy ny rotsa-panala, na ny andro mangatsiaka !
Kanefa aza tsiny, raha mafy akia ny androany !
Avia eto anilako… ry tiako indrindra izany !

DadaRabe
29/08/08 21 :41