TONONKALO HO AN'I RADO (Georges Andriamanantena)

Nampidirin'i dadarabe | 16 Okt, 2008

Ho fahatsiarovana an'i Rado izay lasa nandao antsika.

Na lasana aza izy dia tsy maty satria mipetraka ao am-pontsika ny fahatsiarovana azy.

Ity misy tononkalo iray natolotro azy fony faha-80 ny taonany.

 

RADO (Georges Andriamanantena)
(Tamin'ny Faha-80 taonany)

Am-polo taona maro
No namakiana anao,
Sary mifangaro
No tao an-tsaina tao.

Nentinao nanofy
Teny ambony teny,
Ka afa-drofirofy
Ny fo mirenireny.

Nandroso ireny taona,
Ny ora nifandimby,
Kanefa teny foana,
Mipetraka ho tadidy…

…Ny asa-soratrao
Izay hotehirizinay,
Tsy avelanay handao
F’hitoetra eto aminay.

DadaRabe
Aix-en-Provence
06/03/04 

 


18 Hevitra & 0 Verindrohy (trackback) amin\'ny "TONONKALO HO AN'I RADO (Georges Andriamanantena)"

  1. Ireo havana sy ny ankohonana
    dia irariana hahita fiononana
    Fa ny aina mantsy, manam-petra ihany
    Fandalovana tokoa ny antsika eto an-tany.

    Nampidirin'i lehilahytsyresy 16 Sep 2008, 14:00
  2. misaotra e!

    maro be nareo no hadimby azy!

    Nampidirin'i news2dago 16 Sep 2008, 14:50
  3. Ny tenany no nandao fa ny asa-sorany mitoetra mandrakariva eo amintsika.
    Isika tsirairay no solofo dimbin'ny ala hanohy ny asa fa ny azy efa be no vitany.

    DdRb

    Nampidirin'i DadaRabe 16 Sep 2008, 15:12
  4. maneho fiaraha-miory amin'ny fianakaviana sy ho an'ny Kolotsaina Malagasy.

    Nampidirin'i ikalamako 16 Sep 2008, 16:08
  5. Miara-ory amin'ny fianakavian'i Rado
    Ho antsika rehetra, ny mpanakanto dia tsy maty mandrakizay satria mipetraka hatrany ny maha-izy azy izay navelany ho an'ny velona, tsy ho an'ny ankohonany ihany fa ho an'ny tany sy ny firenena
    Ny mbola hivetsoantsika sy hamakiantsika ny asa sorany no hanamafy izany

    Nampidirin'i sazykely 17 Sep 2008, 12:50
  6. Marina izany ry sazykelY.
    Tsy maty izy raha mbola velona ny asa-sorany.

    Nampidirin'i DadaRabe 17 Sep 2008, 12:57
  7. Les poètes sont un luxe nécessaires. Ils sont à l'humanité ce que le printemps est à la nature ... Le poète RADO est parti au paradis , ces écrits restent . Mais c'est encore mieux de choyer les poètes lorsqu'ils sont encore parmis nous . Hitako fa maro ny poety malagasy , mbola tsy ho very ny finoana , ny fanantenaina sy ny fitiavana ... Nampidirin'i Tritriva 17 Sep 2008, 20:38
  8. Les poètes sont un luxe nécessaires . Ils sont à l'humanité ce que le printemps est à la nature ... Nampidirin'i 17 Sep 2008, 20:47
  9. mirary fiononana feno ho an'ny fianankaviana. Ny vatany no lasa fa ny asa sorany rehetra no mitoetra ho antsika

    Nampidirin'i olga 17 Sep 2008, 21:45
  10. mirary fiononana feno ho an'ny fianakaviana.
    Raha Jehovah no mpiandry, tsy mba misy izay mampaory
    ahi-maitso no andriany
    ranon aina no sotroiny
    ny fanahiny ho velominy
    miasa izy tsy mba matory;
    ...Kanefa teny fôna mipetraka ho tadidy

    Nampidirin'i Tantely 18 Sep 2008, 07:25
  11. Tantely> Sambatra izay matoky Azy !

    Nampidirin'i DadaRabe 18 Sep 2008, 10:49
  12. IRENY TONONKALO !

    Ireny tononkalo
    Dia antsa anaty fo,
    Sy vazo soa mandalo
    Manenika ny loha !

    Dia hiran'ny fitia !
    Koriana tsy ho tana,
    Mikalo ny doria,
    Mandrotsy, manafana !

    Dia ando vao maraina !
    Mamonto koa ny tany,
    Manokatra ny saina,
    Hiaina andro mamy.

    Dia tsantan'ny voahary !
    Mpitondra hafaliana !
    Manala ny maharary,
    Mpizara fitsikiana !

    Dia hiaka ahatsiarovana !
    'Reo andro efa dify,
    Sy anaty izay torovana
    Fa ranomaso ampify.

    Dia ainga fiderana !
    Sy vavaka ho an'ny maro,
    Mitondra fahazavana...
    …Ireny tononkalo !

    DadaRabe
    18/09/08 10 :31

    Nampidirin'i DadaRabe 18 Sep 2008, 13:42
  13. tsy mety lany morses mitsy kou nge dadarabe zany e
    miar matory am stylo s taratasy mitsy angamba lol

    Nampidirin'i sazykely 19 Sep 2008, 14:00
  14. Ha ha ha !
    Sazykely ô!

    Nampidirin'i DadaRabe 19 Sep 2008, 14:59
  15. Miara-ory amin'ny fianakavian'i Rado (Georges Andriamanantena) ny tenako.
    Zaho aloha mino fa tsy misy hahavita tahaka izay vitan'i Rado zay eto Madagasika, aoka anefa tsy ho kivy amin'izany isika satria ny tenany no maty fa ny asa-sorany kosa napetrany ho antsika taraka aty aoriana sy zay mbola ho taranantsika.
    Mandria am-piadanana Rado, hitsena anao k ahitondra anao any am-paradisa anie ny anjely.

    Nampidirin'i Petitte_fille 19 Sep 2008, 15:25
  16. Mandria am-piadanana !

    Nampidirin'i DadaRabe 23 Sep 2008, 13:11
  17. Raha toa ve aho ka teto
    aina firifiry no reko mba nisento
    ho an' ny ainga izay tovoiziko?
    Ny fonareo marefo
    feno irifiry, tomany sy miventso
    tena saingy tsy nampoiziko

    Raha misy fo mitempo
    hipo-pahatsiarovana
    Raha misy saina kivy
    rotik' alahelo
    Aingao 'reo vazivaziko
    mandra-pahatorovana
    ho marika amantarana:
    tsy lasan-davitra aho
    fa mbola hieloelo

    Raha toa ka tsinjonao
    fa nisy iray nandringa tamin' ny làlana nodiaviko
    Dia iny no halao
    ho tsindrona sy apinga
    entina hanitsiana
    ny revy adaladalako!

    Aza adino koa ny mivavaka ho anao
    f' izaho no efa aty!
    Dia tandremo fatratra ny kivy, be talaho
    fa ny ahy io anjoria ....

    (Ho fahatsiarovana manokana ho an' i Rado
    sy ireo akama nialoha làlana rehetra)

    (21/09/08)

    Nampidirin'i Andon' Ny Aina 30 Sep 2008, 01:49
  18. Manja Andon'Ny Aina ô!

    Nampidirin'i DadaRabe 30 Sep 2008, 11:12