« DOBODOBO-TAKARIVA !
MANINA ANAO ! »

SOA FA MINO IANAO !

Nampidirin'i dadarabe | 5 Feb, 2008

Soa fa mino ianao…

…Fa misy ny fitiavana tsy lefin’ireo taona,
Tsy tototry ny atsanga ;
Tsy ravan’ireo mafy sy ny alina misaona
Na ny olana mitranga.

…Fa misy ny maraina ravaham-boninkazo,
Mitsiry, maro loko,
Ka na ririnina aza, tsy maina, tsy malazo,
Tsy miova, tsy miofo.

…Fa misy lohataona mamerovero fatratra
Sy rivotra madio,
Miangaly tsikitsiky sy lanitra tomaratra,
Tsy semban’ny tadio.

…Fa misy loharano miboika tsy ho ritra,
Manjary lasa ony ;
…Fa misy ny fitia tsy mety mangatsiaka,
Lelafo tsy mitony !

…Soa fa mino ianao !

DadaRabe
St Pierre et Miquelon
30/01/08

This entry was posted on 05 Febroary, 2008 02:25 and filed under Tononkalo Fitiavana .

19 Hevitra & 0 Verindrohy (trackback) amin\'ny "SOA FA MINO IANAO !"

  1. misaotra dadarabe nampahery a!

    Nampidirin'i news2dago 05 Feb 2008, 09:41

  2. :-)

    Nampidirin'i ikalamako 05 Feb 2008, 10:24

  3. Mamangy,

    lalina tokoa ity tononkalo mampahery ity !
    Soa ihany tokoa fa eo ny Finoana = Fitiavana = Fanantenana ary ny Fitiavana izay manarona, manamora ny tsy mety rehetra no tsara indrindra !

    Amin'izao ankatonky ny fetin'ny mpifankatia izao dia ilaina vakiana izy ity mba hahamafy toky !

    Ao koa ireo setran'ny fiainana maro (fahafatesana, haretina, tsy fisiana, tsy an'asa, traha-boina amin'ny rivo-doza sns...) dia MANKASITRAKA DdRb o !

    Manasa antsika namana rehetra hitsidika io Blog eo ambany io fa misy KAm miresaka SIRA, sns... ao e !

    O.H.
    http://bd-helysoa.oldiblog.com/

    Nampidirin'i HELISOA 05 Feb 2008, 14:03

  4. Miarahaba ny rehetra> news2dago, Ikalamako, Helisoa
    Misaotra ary mirary andro sambatra ho antsika
    DdRb

    Nampidirin'i DadaRabe 05 Feb 2008, 14:29

  5. soa fa mino ianao
    mino ny fisiako
    fa raha tsy izay ianao
    tsy nanoratra ho vakiako

    Nampidirin'i sazykely 05 Feb 2008, 15:13

  6. clap ! clap ! clap ! sazykely

    Mino fa ianao
    sy ny momba anao
    dia tena misy any
    am-pita lavitra any

    Saingy tsy hita maso
    tsy hita atao andraso
    ka dia tononkalo
    no alefa maromaro

    DdRb

    Nampidirin'i DadaRabe 05 Feb 2008, 15:53

  7. Mankasitraka e !

    Kanto dia kanto !!!

    Nampidirin'i pissoa 05 Feb 2008, 18:09

  8. Misaotra pissoa à
    dia miandry ilay kanto avy any aminao.

    Nampidirin'i DadaRabe 05 Feb 2008, 18:45

  9. tena DadaRabe marina ianao ka! mahery ê! Ary ianao ve izany moa mino ihany koa?
    :-)
    Ryana

    Nampidirin'i Ryana 05 Feb 2008, 22:36

  10. Ahoana izany hoe : tena "DadaRabe" marina izany ry Ryana ? Fa angaha misy "critères" ahafantarana azy ? ;-) Aza manapa-tsinay moa é!

    Moa ve ilay olona ao anatin'ny soratra mino ihany koa ?
    Ny fieritreretako ny firesany dia angamba mino izy ! Asa anefa !

    Nampidirin'i DadaRabe 05 Feb 2008, 22:43

  11. tsara e! tohizo hatrany fa zay matsiaro foana!

    Nampidirin'i news2dago 06 Feb 2008, 09:38

  12. Amintsika Malagasy anie mety hoe anarana ihany ny DadaRabe, fa mety ho "adjectif" koa ("manantona DadaRAbe, mijery DadaRabe, ..."). Sa diso aho? Ka ianao sady anarana no adjectif no fahitàko azy.

    Nampidirin'i Ryana 06 Feb 2008, 10:48

  13. Amintsika Malagasy anie mety hoe anarana ihany ny DadaRabe, fa mety ho "adjectif" koa ("manantona DadaRAbe, mijery DadaRabe, ..."). Sa diso aho? Ka ianao sady anarana no adjectif no fahitàko azy.

    Nampidirin'i Ryana 06 Feb 2008, 10:48

  14. Nipoaka be mihitsy !!!!!! ekena DdRb a !
    Ahavitana zavatra maro rahateo ny finoana. Izaho nino fa misy tononkalo milay be ao dia niditra indray androany dia ... ao tsara ! Misaotra e

    Nampidirin'i Tsikisariaka 06 Feb 2008, 13:10

  15. news2dago> HO natsika rehetra é!

    Ryana> Ny anarana anie tanim-boanjo Ryana ô ! RAha tantely ve ny anaran'ilay olona dia mety hanaikitra ? sa diso aho ?

    Tsikisariaka> ie, ahavitana zavatra maro ny finoana
    ary tsy mampirona

    Nampidirin'i DadaRabe 06 Feb 2008, 13:22
  16. misaotra an dadarabe am le tonokalo tsara be ts itako ze o tenenina fa de misaotra anao bdb lol Nampidirin'i sazykely 06 Feb 2008, 13:24

  17. aza mampitovy lakana aman-jahatra re DadaRabe ô!
    hainao fa tsy izay no tiako nolazaina .
    Tsarà ê!
    Ryana

    Nampidirin'i Ryana 06 Feb 2008, 14:28

  18. Ryana> Eny ary é! ataoko toy ny hoe haiko ny tianao lazaina. Ha ! ha ! ha !

    Fa ilay lakana izany tsy mitovy amin'ny zahatra ? nefa samy mitety rano ? sa diso aho ? ;-p

    Nampidirin'i DadaRabe 06 Feb 2008, 15:52

  19. Misaotra an'i sazy kely koa. Azafady fa tsy hitako io valin-teninao io fa niditra spam.

    Tsarà hariva é! (ny aty mbola mitataovovonana)

    Nampidirin'i DadaRabe 06 Feb 2008, 15:54