MANJA BE NY MASONAO (Valin-tononkalon'i Tiana Valisoa @ tononkalon'i DadaRabe NY MASONAO)
Nampidirin'i dadarabe | 13 Nov, 2007
Manja be ny "masonao", maha-te hihirahira
Tononkalo feno hery
Manja be ny "masonao", sady mamy no masira
Manamaivana ny fery.
Rakotr'ando izao ny masoko, vontovonton'ny tomany
Nofefena tsy hijery
Ankehitrio anefa liana, te-hahafantatra izany
Olon-tiana, tsy irery.
Tiana Valisoa
Jolay 2007
NY MASONAO...
Ny masonao no hitarafako
Ny ampitsoko tsy fantatro,
Ary ireo no hibanjinako ny lalana hombako,
Sy ny savorovorom-piainana tsy afaka raràko,
Izy no aiko,
Ka lazaiko.
Ny masonao no masoandro,
Manazava ny atoandro,
Sy ny alina mangina izay mibaby nofy mamy,
Sy ny fiainako sondriana ary manantena hatrany,
Satry foana!
Ho eo an-taona !
Ny masonao no hitsiloako
Ny haizim-pito tato am-poko,
Ka nanjary fifaliana no nameno ny tontolo,
Safononoka sy mihira antsa mirana daholo,
Voninkazo,
Tsy halazo.
Ny masonao no hany mamy,
Ka na ho maizina ny androany,
Dia hinoako sy antenaiko fa ho rahona mandalo,
Toy ny sery izay manembana ny vazo sy ny kalo,
Manavao...
Ny masonao !
DadaRabe
Aix-en-Provence
12/12/02 20 :23
Mahafinaritra be daholo
Nampidirin'i Tsikisariaka 29 Nov 2007, 12:57Izaho indray no velom-bolo
Afa-po sy afa-diana
Tototry hafaliana
Fa kanto loatra ireto izy
Tohizo hatrany re rankizy
Tafiditra ihany !
Kanto !
DdRb
Nampidirin'i DadaRabe 29 Nov 2007, 14:16