« TENY MALAGASY !
IZY ANGAMBA ANY… »

RAHA FANTATRAO RY NENY…

Nampidirin'i dadarabe | 14 Jol, 2007

Raha fantatrao ry neny, ny ady izay atrehiko
Aty an-tany lavitra, ny mafy tsy voafehiko ;
‘Reo olana mitranga sedraiko isan’andro,
Ny vatako efa trotraka raha mody ny masoandro. 

Raha hitanao ny dinitra mirotsaka ny tavako,
Ireny manaintaina manenika ny vatako,
Nataoko toa tsy nisy, niaretako mazàna,
F’izany no safidiko… ny lalana malama. 

Tsy mba fantatrao … ireny alahelo,
Rehef’izaho mahatsiaro sy mba mamelovelo
Ny tranokelintsika…fahiny mantsy izany!
Kanefa anie dia ferako ny foko ts’hitomany. 

Fa toy ny vao omaly ‘reo teny nomenao
An-taona maro izay, fony izaho handao,
Hisidin’any lavitra, hikaroka ny soa,
Mbol’ato am-poko ato, tadidiko avokoa. 

Fa saingy horovitiko ity taratasy ity,
Ts’izany no andrasanao avy amiko aty,
F’handeha hanoratr’aho: “mazava ny marainako”
“Sambatr’aho ry neny… milamina ny fiainako!” 

DadaRabe
Marseille
06/05/01 11:00 

This entry was posted on 14 Jolay, 2007 15:18 and filed under Tononkalo Fitiavana .

10 Hevitra & 0 Verindrohy (trackback) amin\'ny "RAHA FANTATRAO RY NENY…"

  1. mba andefaso tonokalo momba ny fiainana izahay. Misaotra mialoha.

    Nampidirin'i jajiha 17 Jol 2007, 11:45

  2. Andraso fa hampiditra tononkalo momba ny fiainana aho rehefa avy eo. Misaotra an'i Jajiha

    Nampidirin'i DadaRabe 17 Jol 2007, 18:12

  3. saika latsaka ny ranomasoko.
    Soa ihany tokoa fa norovitinao ilay taratasy fa tsy nalefanao ho an'i neny....

    Nampidirin'i oly 18 Jol 2007, 21:36

  4. Ranomaso vokatry ny fo ! tsy maninona raha ho an'i neny.
    Sa ahoana ?

    Nampidirin'i dadarabe 19 Jol 2007, 02:48

  5. tsy izany fa tena mampahatsiaro ny fahiny ilay tononkalo

    Nampidirin'i oly 20 Jol 2007, 13:24

  6. Ny fahiny Fahatsiaro
    Ny fahiny zava-maro
    Ny fahiny tsy ho very
    Ny fahiny anie mahery !

    DdRb 20/07/07

    Nampidirin'i DadaRabe 20 Jol 2007, 17:00

  7. fahatsiarovana tsy azo vonoina
    fa mamy mangidy ao anatin'ny fo
    tsy zaza matory ........ tsy tadidiko 'tsony ny tohiny

    Nampidirin'i oly 25 Jol 2007, 18:30

  8. Misaotra an'i Oly

    DdRb

    Nampidirin'i DadaRabe 25 Jol 2007, 20:21

  9. ianao no tena isaorana mandefa tononkalo bdb eto

    Nampidirin'i oly 25 Jol 2007, 21:06

  10. Andraso fa tsy nahatafiditra aho tato ho ato ry Oly fa miasa be.
    DdRb

    Nampidirin'i DadaRabe 27 Jol 2007, 19:55