TAMBOLIN’NY FOTOANA

Nampidirin'i dadarabe | 16 Jan, 2009




Misy indraindray…vaka ny aty saina,
Hila tsy ho avy miana !
Fa entin’ny eritreritra manidina ambony,
Manjary tsy mitony…
Misankodinkodina ny omaly sy ny androany
Ary koa ny ampitso…dia mifangaro izany !

Moa ny fotoana no tena mihazakazaka ?
Sa tsy haiko ny manavaka
Ny lasa efa ela sy ny andro vao omaly ?
Fa hitako toa sary
Voarakitra hiray, mitambatra daholo…
Sary hoso-doko… iray…mitovy volo !

Ny saiko ve no jenjin’ny tambolin’ny fotoana ?
Asa re nahoana ?
Sa kosa velovelo mifongatra tsy nahy
Manaitra ny fanahy ?
Ka korontandrontana no sisa hitako eto
Korontan’ny fanahy arahin-tsentosento !

DadaRabe
14/12/08 


24 Hevitra & 0 Verindrohy (trackback) amin\'ny "TAMBOLIN’NY FOTOANA"

  1. ny isavorovoroan- (n'ilay fanahy arahintsento), kilantoana hono e...

    Nampidirin'i ikalamako 18 Des 2008, 00:04
  2. Isavorovoroan-kilantoana marina.
    Salama ry Ikalamako Elaela kely izay !

    Nampidirin'i DadaRabe 18 Des 2008, 12:46
  3. Miarahaba,
    Efa ela no tsy haino i DadaRabe izany !
    Izao aho dia mandinika fatratra ity tononkalo vaovao...

    Nampidirin'i Tritriva 18 Des 2008, 15:05
  4. Nanao ahoana ny tany Ramena e?

    Nampidirin'i finoanaranoray 18 Des 2008, 15:48
  5. Tritriva> Tena tany ho any aho dia tsy afa-nanoratra firy ry Tritriva fa dia izao faly mifankahita eto izao indray.

    Finoanaranoray> tena tsy lasa tany ramena aho tamin'ity. Saika handeha fiara ho any Atnsiranana dia somary tratran'ny tazo kely dia nahemotra ho zokin'ny ao aoriana indray é!

    Nampidirin'i DadaRabe 18 Des 2008, 16:29
  6. Do, do, do ooo!!!! Faly mandalo ato amin'ity tranokelinao ity e! Dia mirary fety sambatra daholo!
    Mankafia hatrany ireo tononkalo e!

    Nampidirin'i Pone 18 Des 2008, 17:32
  7. Pone> miarahaba fa elaela indray izay é! Mirary fety ho anao sy ny rehetra ihany koa !
    Misaotra é!

    Nampidirin'i DadaRabe 18 Des 2008, 18:18
  8. sali sali DadaRabe ela tsy heno izay. Aiza indray ianao misy connex io ? Hanao Noely anaty ranomandry sa mianoka hafanana ? Mirary soa hatrany e, manao fety sambatra.

    Nampidirin'i ikalamako 19 Des 2008, 00:23
  9. Arahabaina fa tonga soa tafaverina soa aman-tsara avy tany Antseranana i DadaRabe.

    Nampidirin'i lehilahytsyresy 19 Des 2008, 08:10
  10. Ikalamako> tena efa fotsy botsiaka izao no manodidina ahy fa angaha ahoana ! Dia mitandrina "fa malama anie ny lalana ka tsy misy hamaharana" (Dox). Mirary fety sambatra é! Manao ahoana ny andro any aminareo ?

    Lehilahytsyresy> Ka manao ahoana é! tafaresaka tamin'ireo namana (Ra-Dom) hiombonana aho dia nahatsiaro anao izahay. HOe mbola any amin'ny tanin'ny masoandro miposaka ilay akama. Ilay namana tany aminareo fahiny hono any Toamasina mikarakara ny radiologie.

    Nampidirin'i DadaRabe 19 Des 2008, 13:39
  11. Tsisy fisaorana! Torak'izany mirary fety sambatra ho anao sy ny ankohonanao ary ireo rehetra tonga ato koa!

    Nampidirin'i Pone 19 Des 2008, 18:27
  12. Pone> Dia ho avy tokoa ny fety. Manorana be ao Antananarivo. Fotsy botsiaka ny andro eto ary mipatrapatraka ny rotsa-dranomandry.
    Mirary krisamasy sambatra ary taom-baovao sambatra

    Nampidirin'i DadaRabe 19 Des 2008, 20:11
  13. DadaRabe => Misaotra indrindra tamin' ny vaovao mikasika ireo namana iraisana !
    Fa hono ho'aho, ao Mahajanga ve io rotsa-dranomandry mipatrapatraka io ?
    ______
    Ity indray ary ny tononkalo week-end androany e:
    _______
    Tonga indray ity ny Sabotsy sy Alahady.
    Amin' ny herinandro, efa Krismasy sahady.
    Fanomezana cadeaux ho an'ny zanaka amam-bady.

    Nampidirin'i lehilahytsyresy 20 Des 2008, 07:51
  14. Lehilahytsiresy> Orana no misy ao Mahajanga kah ! Orana sy hafanana.

    Sabotsy sy alahady
    akana aina kely
    Fa mbola mafy ady
    n'akaiky ny noely

    Hiantsena koa fa sao...
    I dadabe noely
    Tsy manana cadeaux
    Ho an'ny zazakely

    Izay aloha é!

    Nampidirin'i DadaRabe 20 Des 2008, 16:31
  15. Miarahaba,
    Aoka ry namana fa
    Lasa lavitra ny saina
    Maro ny olona eto an-tany
    No vaka ny saina
    Iza ary no tsy nanana
    Na indray monja aza
    Ny eritreritra nandeha
    Ambony lavitra ?
    Aleo alefa izay tsy tana
    Mihaino izay tia
    Mifangaro daholo ny omaly
    Androany ary ny ampitso ?
    Fiainana anie izany
    Olombelona ny tena !
    *
    J'aime bien le sablier
    Entre le ciel et l'eau
    Et le temps qui passe
    Inexorablement
    *
    Mirary fety sambatra ho antsika rehetra sy ny sisa sy ny sisa...

    Nampidirin'i Tritriva 21 Des 2008, 11:41
  16. Tritriva> Olombelona ny tena ! Fiainana daholo izany ! marina izany ry Tritriva.
    Mirary fety sambatra ho anao sy ny rehetra.

    Nampidirin'i DadaRabe 22 Des 2008, 13:24
  17. Faly foana mandalo eto. Dia mirary ny rehetra ho tratry ny taona vaovao feno fahasoavana sy fanambinana ary fahasalamana indrindra. Ho tanteraka amin'ny tsi11 anie ireo firariantsoa rehetra hatrizay!
    Tohizo foana ny tononkalo DdRb fa izahay anie na tsy miteny firy aza mankafy foana e!

    Nampidirin'i Pone 30 Des 2008, 18:58
  18. Mirary taom-baovao sambatra ho anao koa Pone à!
    Miasaotra amin'ny tononkalo.

    Nampidirin'i DadaRabe 30 Des 2008, 20:41
  19. Tratry ny taona e! Mirary soa sy fanambinana mandritry ny taona.
    Fa tononkalo aiza izany?

    Nampidirin'i Pone 03 Jan 2009, 19:28
  20. Manomboka ny taona ary Pone dia manomboka koa ny fiainana isan'andro. Rehefa vita ity faran'ity herinandro ity dia elaela indray vao misy andro tsy fiasana.
    Ny tsara foana no irariana é!

    Nampidirin'i DadaRabe 03 Jan 2009, 22:20